कनिका खबर
भदौ ३१, दाङ ।
नेपाली काङ्ग्रेसका महामन्त्री डा. शशांक कोइराला अस्पताल भर्ना भएका छन् । कोइरालालाई भदौ २३ गते कोरोना संक्रमण पुष्टि भएको थियो । कोरोना पुष्टि भएपछि उनी होम आइसोलसनमा बसेका थिए । कोइरालालाई माइल्ड निमोनिया र ज्वरो देखिएपछि अस्पताल भर्ना गरिएको हो ।
घरमै स्वास्थ्यलाभ गरिरहेका कोइरालालाई निमोनियाको शंका लागेपछि मंगलबार साँझ चाबहिलस्थित ओम अस्पताल भर्ना भएको कोइरालाका स्वकीय सचिव भरत तिवारीले जानकारी दिए ।
हल्का ज्वरो र रुघाखोकी देखिए पनि स्वास्थ्य अवस्था सामान्य रहेको तिवारीले बताए । कोइरालालाई प्यारासिटामोल दिएर आईसीयूभित्रको आइसोलेसनमा चिकित्सकीय निगरानीमा राखिएको पनि तिवारीले जानकारी दिए ।