कनिका खबर
कार्तिक १, काठमाडौं
नवरात्रको पहिलो दिन आज घटस्थापना, घटस्थापनाको अवसरमा नेपालीहरुको घर घरमा बडादसैंको जमरा राखिएको छ । दसैंको पहिलो दिन घटस्थापनाका अवसरमा हिन्दु धर्मावलम्बी नेपालीको घर, घरमा जमरा राख्ने गरिन्छ । घटस्थापनाकै दिन काठमाडौंको वसन्तपुरमा रहेको दसैंघरमा पनि जमरा राखिएको छ । नेपाली सेनाको टोलीले मंगल धुन बजाएर बढाइँ गरेसँगै आज बिहान ११ः४६ को शुभसाइतमा जमरा राखिएको हो । कोभिड १९ का कारण यो वर्ष केही समस्या भएपनि स्वास्थ्य सुरक्षाका मापदन्ड अपनाएर जमरा राखिएको शार्दुलजंग गुल्मका गुल्मपति सेनानी विकाश शाक्यले बताउनुभयो । विश्व नै कोभिड १९ बाट प्रभावित भएपनि पूजालाई सुरक्षाका सम्पूर्ण मापदन्ड अपनाएर निरन्तरता दिइएको उहाँले बताउनुभयो । बिहानै नित्यकर्म गरी नजिकको नदी वा चोखो स्थलबाट बालुवा वा माटो ल्याइ गाईको गोबरले लिपपोत गरिएको कोठामा वा दसैंघरमा जमरा रोप्ने गरिन्छ । घटस्थापना गर्दा पूजाकोठा वा दसैंघरमा विधिपूर्वक दियो, कलश र गणेश स्थापना गरी वैदिक विधिपूर्वक शक्तिकी अधिष्ठात्री दुर्गाको आह्वान गरी पूजा आरम्भ हुन्छ । नवरात्रभर दुर्गाका तीन रुप महाकाली, महालक्ष्मी र महासरस्वतीको विधिपूर्वक पूजाराधना गरिन्छ ।
