कनिका खबर
कार्तिक १९, नुवाकोट
विश्वव्यापी महामारीको रुपमा फैलिरहेको नोवेल कोरोना भाइरसको सङ्क्रमण बढेपछि केहि दिन अगाडि खुलेका रसुवाका होटेलहरू पुनः बन्द भएका छन् । पर्यटकीय लाङटाङ पदमार्गमा सञ्चालनमा रहेका होटलहरू मंगलवारदेखि बन्द भएका हुन् । कोरोना सङ्क्रमणको जोखिम बढ्दै गएपछि पर्यटकिय हिमाली रसुवाको गोसाइँकुण्ड गाउँपालिका वडा नं. ४ को होटल व्यवसाय समितिको आग्रहमा होटल बन्द गरिएको हो । कोरोना सङ्क्रमितको संख्या बढ्दै गएकाले केही महिनासम्म होटेल, लज तथा चिया पसल बन्द गरिएको वडा कार्यालयले जनाएको छ । कार्यालयका अनुसार पदमार्गको रिम्छे, लामा होटल, रिभर साइड, घोडा तबेला, गुम्बा डाँडा, लाङटाङ, मुण्डुप, क्यान्जिनलगायतका क्षेत्रमा रहेका होटल, लज तथा चिया पसल बन्द भएका हुन् । क्यान्जिनका पर्यटन व्यवसायी ग्याल्बु लामाका अनुसार पछिल्लो समय दैनिक ६० जनासम्म नेपाली पर्यटक आइरहेका थिए । रसुवामा आएका पर्यटकमध्ये ९० प्रतिशत पर्यटक लाङटाङ जाने गरेका छन् । हाल रसुवाको पर्यटकिय स्थान घुम्ने उपयुक्त मौसम हो । रसुवामा कोरोना सङ्क्रमितको संख्या १ सय ६ जना पुगेको छ । जसमा ४५ जना सक्रिय सङ्क्रमित छन् ।
