कनिका खबर
कार्तिक १९, काठमाडौं
वैदेशिक रोजगार बोर्डले वैदेशिक रोजगार कल्याणकारी कोषमा डिजिटल भुक्तानी सेवा प्रदायक संस्थामार्फत् रकम जम्मा गर्न सकिने व्यवस्था गरेको छ । वैदेशिक रोजगार नियमावली, २०६४ को नियम २४ बमोजिम श्रम स्वीकृती लिई वैदेशिक रोजगारमा जाने नेपाली कामदारले वैदेशिक रोजगार कल्याणकारी कोषमा जम्मा गर्नुपर्ने व्यवस्था रहेको छ । त्यसै अनुसार अबदेखि रकम स्वदेश तथा विदेश जहाँ भए पनि नेपाल राष्ट्र बैंकबाट अनुमति प्राप्त भुक्तानी सेवा प्रदायक संस्था ईसेवा फोन पे, र स्प्यारो पेबाट सरल र सहजरुपमा अनलाईन प्रणाली मार्फत् भुक्तानी गर्न सकिने गरी व्यवस्था मिलाईएको बोर्डका कार्यकारी निर्देशक राजन श्रेष्ठले बताउनुभयो । साथै, तोकिएका भुक्तानी सेवा प्रदायक संस्थाबाट सेवा लिए बापत् सेवाग्राहीले भने कुनै पनि थप शुल्क तिर्न नपर्ने गरी आवश्यक व्यवस्था मिलाईएको बोर्डले जनाएको छ । बोर्डका अनुसार दुई वर्षसम्मको करार अवधि भएका कामदारले १५ सय रुपैयाँ बुझाउनुपर्ने हुन्छ भने त्यसभन्दा बढी करार अवधि भएकाले २५ सय रुपैयाँ जम्मा गर्नुपर्ने हुन्छ । खाडी राष्ट्र र मलेसिया जाने कामदारले १५ सय रुपैयाँ तिर्नुपर्छ भने कोरिया, इजरायल, जापानलगायतका देशमा करार अवधि तीन वर्षभन्दा बढी भएकाले २५ सय रुपैयाँ तिर्नुपर्छ ।
