कनिका खबर
कार्तिक २६, दाङ ।
यस वर्षको तिहारको तिथिमा विवाद देखिएपछि मंसिर १ र २ गते सरकारले सार्वजनिक विदा दिने भएको छ ।
नेपाल पञ्चाङ्ग निर्णायकका अनुसार यसवर्ष कात्तिक २९ गते बिहान कुकुर तिहार र साँझ लक्ष्मीपूजा, ३० गते गाईरगोरु पूजा तथा नेवाः समुदायको म्हपूजा र मंसिर १ गते गोवद्र्धन पूजा तथा भाइपूजाको तिथि परेको बताइएको छ ।
२९ गते दिउँसो १ः४९ बजेदेखि ३० गते बिहान ११ः२७ बजेसम्म औँशी तिथि रहन्छ । त्यसैले कात्तिक २९ गते लक्ष्मीपूजा गर्नु उपयुक्त रहने पञ्चाङ्ग निर्णायकले जनाएको छ ।
तर नेवाः समुदायले २९ गते नरक चतुर्दशीका दिनमा लक्ष्मीपूजा नगर्ने बताएका छन् । यसोगर्दा ३० गते लक्ष्मीपूजा, मंसिर १ गते नेपाल संवत् नयाँ वर्षको पहिलो दिन म्हपूजा र मंसिर २ गते मंगलबार किजा पूजा (भाइटीका) गर्नुपर्छ ।
नेवाः समुदायलाई सम्बोधन गर्न सरकारले २ मंसिरमा पनि सार्वजनिक बिदा दिने निर्णय गरेको हो ।