कनिका खबर
मंसिर २४, काठमाडौं
कर्णाली प्रदेश सरकारले चालु आर्थिक वर्षको पहिलो चौमासिकमा दुई प्रतिशत विकास बजेट मात्रै खर्च गरेको छ । मुख्यमन्त्रीसहित मन्त्रीहरुले प्रदेश सरकारको चालु आर्थिक वर्षको पहिलो चौमासिक प्रगति समीक्षा गर्दै चालु आर्थिक वर्षको चौमासिक खर्च निकै निराशाजनक देखिएको बताएका छन् । तर सीआईएनसँग कुराकानी गर्दै कर्णाली प्रदेशका आर्थिक मामिला तथा योजना मन्त्री प्रकाश ज्वालाले बाहिर सार्बजनिक भएको तथ्याङ्क पूर्ण रुपमा सही नभएको दाबी गर्नुभएको छ । प्रदेश सरकारले चालु आर्थिक वर्ष ३३ अर्ब ७४ करोड १३ लाख बजेट ल्याएको थियो । जसमध्ये पहिलो चार महिनाको अवधिमा जम्मा एक अर्ब १२ करोड ९९ लाख ८४ हजार १ सय २९ रुपैयाँ खर्च गरेको प्रदेश लेखा नियन्त्रण कार्यालयले जनाएको छ । अन्य प्रदेशमा पनि पहिलो चौमासिकको विकास खर्च उत्साहजनक हुन सकेको छैन । यस वर्ष कोरोना महामारीको असरका कारण विकास खर्च कमजोर देखिएको प्रदेश सरकारहरूको दाबी छ ।
