बैशाख २१, काठमाडौँ ।
कोरोना जोखिम बढ्दै गइरहेको बेला कोरोना सङ्क्रमितका लागि आवश्यक पर्ने रेम्डेसिभर औषधिमा कालोबजारी छाउन थालेको छ । औषधिमा कालोबजारी भएको जनगुनासो आउन थालेपछि औषधि व्यवस्था विभागले कारवाही गर्ने चेतावनी दिएको हो ।
औषधि व्यवस्था विभागले कोभिड–१९ का बिरामीका लागि प्रयोग हुने औषधि रेम्डेसिभर बढी मूल्यमा बेचेका पाइएमा कारवाही गर्ने बताएको हो ।
विभागका महानिर्देशक भरत भट्टराईले हिजो सोमबार एक सूचना जारी गर्दै सो औषधि बढी मूल्यमा बेचेको जनगुनासो आएकाले कारवाही गरिने बताएका छन् ।
सङ्क्रमण फैलिरहेका अवस्थामा बिरामीका लागि प्रयोग हुने रेम्डेसिभर औषधिको कृत्रिम अभाव गरेर न्यूनतम मानवीय संवेदनासमेत ख्याल नगरी अधिकतम खुद्रा मूल्यभन्दा बढीमा बिक्री गर्नेलाई कारवाही गरिने उनले बताए ।
विभागले अधिकतम खुद्रा मूल्यभन्दा बढीमा बिक्रीवितरण नगर्न÷नगराउन तथा तोकेको खुद्रा मूल्यभन्दा बढीमा खरीद नगर्न सबैमा आग्रहसमेत गरेको छ ।
अहिले सङ्क्रमण बढिरहेका अवस्थामा रेम्डेसिभरलाई बढी मूल्यमा बेच्ने गरेको पाइएको छ । रेम्डेसिभरको एक मात्राका लागि करिब ५ हजार पर्छ । काठमाडौमा रेक्डेसिभर औषधि अभाव भएपछि कालोबजारी मौलाएको हो । एक मात्राका लागि ५ हजार पर्ने औषधिलाई २० हजारसम्ममा बेच्ने गरिएको पाइएको छ । औषधिमा कालोबजारी हुन थालेपछि विभागले सचेत गराएको हो ।