काेराेना कहरमा दाङमा युवाहरूकाे नयाँ अभियान: कोरोना संक्रमितलाई पौष्टिक आहारा

अभियानमा लागेका युबाहरुले प्रत्यक दिन यसैगरि कोरोना संक्रमितहरुलाई पौष्टिक आहार उपलब्ध गराउने बताएका छन् । कोरोना संक्रमितहरुलाई पौष्टिक आहारले रोग संग लड्न सक्ने क्षमता प्रदान गर्ने भएकाले मानवीय नाताले पनि यो अभियान थालिएको अभियानका संयोजक सञ्जिब पछाईँले जानकारी दिए । ‘अहिले कोरोनाको महामारीमा हामी सबै आक्रान्त बनेका छौँ, बिरामीहरुलाई अस्पतालहरुमा धेरै असहज परिस्थती छ,’ पछाईँले भने ‘यो महामारीका बेला मानवीय नाताले पनि सानै भएपनि बिरामीहरुलाई सहयोग गरौँ भन्ने उदेश्यका साथ युवाहरु मिलेर यो अभियानको सुरुवात गरेका हौँ ।’ अभियानका आर्थिक संयोजक कुलराज पोखरेलले अभियान प्रत्यक दिन सञ्चालन हुने जानकारी दिए । ‘हामीहरुले पौष्टिक आहार संकलन गरेर बिरामीहरुलाई दिनहुँ रुपमा उपलब्ध गराउने छौँ,’पोखरेलले भने ‘कोरोना संक्रमणका कारण अस्पतालमा थलिएका बिरामीहरुलाई कम्तिमा पनि पौष्टिक आहार मिलोस् भन्ने हाम्रो अभियानको लक्ष हो ।’ सोमबार देखि सुरु भएको यो अभियान बेलझुण्डि अस्पतालबाट प्रारम्भ भएको र जिल्लाका अन्य अस्पताल र आईशालेशनमा रहेका बिरामीहरुलाई पनि यो सहयोग प्रदान गरिने अभियानमा लागेका युबाहरुले बताएका छन् । घरमै रहेका बिरामीहरुलाई समेत पौष्टिक आहार उपलब्ध गराउने लक्ष यो अभियानले लिएको छ । ‘हामीहरुले बेलझुण्डिमा रहेको कोरोना बिशेष अस्पतालबाट यो अभियानको प्रारम्भ गरेका छौँ, यो अभियान जिल्लाका अन्य अस्पताल र आईशोलेशन सम्म पुर्याउने गरि आवश्यक समन्वय गरिरहेका छौँ,’यो अभियानमा लागेका अर्का अभियन्ता निरज गिरीले भने ‘घरमै रहेका बिरामीहरुलाई समेत हामीहरुले यो सहयोग गर्नेछौँ ।’ बिरामीहरुलाई दिनुहुँ अण्डा, चना र शुद्ध पिउने पानी (मिनिरल वाटर)उपलब्ध गराउने गरि अभियान अगाडी बढाउने उनिहरुले बताएका छन् । उनिहरुले चना पकाएर तथा अण्डा उसिनेर बिरामीहरु सम्म पुर्याउने गरेका छन् ।