बुटवल, २८- वैशाख/
लुम्बिनी प्रादेशिक अस्पतालको इमर्जेन्सीमा उपचाररत थप १२ कोरोना संक्रमितको मृत्यु भएको छ । रुपन्देहीका ७ जना, कपिलवस्तुका ३ जना, नवलपरासी पश्चिम र प्युठानका एक–एक जनाको मृत्यु भएको अस्पतालले जानकारी दिएको छ । १२ जना मृतक मध्य ११ जना पुरुष र एकजना महिला रहेका छन् ।
उनीहरु मध्य ५ जनाको गएराति १२ बजे यता बिहानसम्म, ४ जनाको सोमबार दिउसो साढे ४ बजेपछि राति १२ बजेसम्म, २ जनाको २६ गते र एक जनाको २४ गते दिउसो मृत्यु भएको अस्पतालका सूचना अधिकारी डा. विष्णु गौतमले जानकारी दिए । २४ गते र २६ गते मृत्यु भएका संक्रमितको शव व्यवस्थापन नभएकाले मंगलबार मात्र जानकारीमा आएको डा. गौतमले बताए ।
सूचना प्रविधि क्षेत्रको छुट्टै जनशक्ति नहुँदा बिरामीको उपचारमा खटिनु पर्ने चिकित्सकले नै त्यो जिम्मेवारी निभाउनु पर्दा निकै अप्ठेरो भएको उनको गुनासो छ ।