मा प्रकाशित
जेठ १२, काठमाडौँ ।
राष्ट्रपति विद्यादेवी भण्डारीले चिनियाँ राष्ट्रपति सी जिनपिङसँग नेपाललाई आवश्यक कोरोना भाइरसविरुद्धको खोप खरिदमा सहजीकरण गरिदिन अनुरोध गर्नुभएको छ ।
आज दुई राष्ट्रपतिबीच करिब ४० मिनेट कुराकानी भएको राष्ट्रपति कार्यालयले जनाएको छ ।
कोभिड १९ बाट नेपाली जनताको जीवन रक्षा आफ्नो पहिलो दायित्व बनेको राष्ट्रपति भण्डारीले बताउनुभएको छ । नेपाली जनतालाई आवश्यक पर्ने मात्रामा चीनबाट खोप खरिद गर्न आफू इच्छुक रहेको भन्दै उहाँले यस प्रक्रियामा सहजीकरण गरिदिन चीनियाँ राष्ट्रपतिलाई आग्रह गर्नुभएको थियो ।
जवाफमा चिनियाँ राष्ट्रपति सीले नेपाल चीनको अभिन्न मित्र रहिआएको र नेपालले मागेको सहयोगबारे अधिकारीहरुसँग बुझ्ने बताउनुभएको राष्ट्रपति कार्यालयले जनाएको छ ।
