प्रतिनिधि सभा विघटन विरुद्धको मुद्दामा आज संवैधानिक इजलास बस्दै

जेठ २३, काठमाडौँ ।
प्रतिनिधि सभा विघटन विरुद्धको मुद्दामा सुनुवाइ गर्न सर्वाेच्च अदालतमा आज संवैधानिक इजलास बस्दै छ । इजलासका लागि आज प्रधानन्यायाधीश चोलेन्द्र शम्शेर जबराले वरिष्ठताका आधारमा नयाँ न्यायाधीश चयन गर्ने सम्भावना छ ।

यही जेठ १८ मा बसेको संवैधानिक इजलासमा प्रधानन्यायाधीश जबराले प्रतिनिधिसभा विघटनसम्बन्धी मुद्दा सुनुवाइका लागि २३ जेठमा वरिष्ठताका आधारमा न्यायाधीश राखेर संवैधानिक इजलास तोक्ने प्रतिबद्धता जनाउनुभएको थियो । नेकपा विभाजनसम्बन्धी फैसला गर्ने न्यायाधीश बमकुमार श्रेष्ठ र पुनरावलोकनको माग अस्वीकार गर्ने तेजबहादुर केसीलाई इजलासमा राख्दा यसले निष्पक्ष फैसलामा असर गर्ने भन्दै अधिवक्ताहरूले विकल्प खोज्न आग्रह गर्दै आएका छन् ।