शिवु खनाल
दाङ, ११ भदौ /
डिभिजन वन कार्यालय दाङ (देउखुरी) लमहीले ५३.८९ क्युफिट अवैध सालकाे काठ सहित तीनजनालाई पक्राउ गरेको छ । गए राती करिब तीन बजे क्रकहवाबाट लमही तर्फ लु २ च ७७४१ नम्बरको पिकअप जिपमा १७ थान चिरानकाे ५३.८९ क्युफिट अवैध सालकाे काठ ल्याउने क्रममा इलाका प्रहरी कार्यालय गढवाले नियन्त्रणमा लिइ शुक्रबार डिभिजन वन कार्यालय दाङ (देउखुरी) लमहीलाई बुझाएको हाे ।
पक्राउ पर्नेमा गढवा गाउँपालिका वडा नम्बर ४ खडकपुर निवासी २४ वर्षिय साहीद मुसलमान, राप्ती गाउँपालिका वडा नम्बर ५ कालापानी निवासी २६ वर्षिय प्रदिपकुमार चाैधरी र साेही पालिका वडा नम्बर ८ पिपरा निवासी ३७ वर्षिय बिनाेद चाैधरी रहेको डिभिजन वन कार्यालय दाङ देउखुरी लमहीका प्रमुख बेसिन्द्रराज सुबेदीले जानकारी दिनुभयो । उहाँका अनुसार पक्राउ पर्नेहरू माथि आवश्यक कार्वाहीकाे लागि थप अनुसन्धान भइरहेको छ ।
पछिल्लो समय यता डिभिजन वन कार्यालय दाङ देउखुरी लमहीले सक्रियता बढाएपछि अवैध काठमा संलग्नता हुनेलाई धमाधम पक्राउ गरेको छ ।
