भदौ १२, काठमाडौँ ।
नेकपा एमालेका अध्यक्ष केपी शर्मा ओलीले माधवकुमार नेपाल सहितका नेताले अर्को पार्टी गठन गर्दैमा केही फरक नपर्ने बताउनुभएको छ । आज युथफोर्सले आयोजना गरेको कार्यक्रममा उहाँले एक दुई पात पहेंलिएर खस्दैमा रुखलाई केही फरक नपर्ने र रुखमा नयाँनयाँ पालुवा पलाउँदै जाने तर्क गर्नुभयो ।
अध्यक्ष ओलीले माधव नेपालले गठन गरेको नेकपा एकीकृत समाजवादी पार्टीले अरु पार्टीसँग मोर्चाबन्दी गर्ने बारेमा आफूले सुनेको भन्दै एमालेसँग एक्लै लड्न सक्दिन भन्ने निष्कर्षमा पुगेको टिप्पणी गर्नुभयो ।
उहाँले एमालेलाई षड्यन्त्रपूर्वक सरकारबाट हटाइएको भन्दै अब आउने चुनावमा सबै षड्यन्त्रको हिसाब लिने पनि बताउनुभयो । अब कुनै पनि निर्वाचन क्षेत्रमा अरुलाई जित्न नदिने उहाँको भनाइ छ । अध्यक्ष ओलीले पार्टी फुटेको नभई केही बिग्रिएका मान्छेले पार्टी छाडेको बताउनुभयो । ओलीले एमाले फुटेको नभई अलिकति चोइटिएको बताउनुभयो ।