असोज १४, काठमाडौँ ।
महालेखा परीक्षकको ५८औँ वार्षिक प्रतिवेदन संसदमा पेश भएको छ । आज बसेको प्रतिनिधिसभाको बैठक सुरु हुनासाथ एमाले सांसदहरूले वेल घेराउ गर्दै नाराबाजी गरेका थिए । सभामुख अग्नि सापकोटाले संसद निर्वाध रुपमा चलाउनका लागि सहयोग गर्न पटकपटक आग्रह गर्नुभएको थियो ।
तर एमाले सांसदहरूले नाराबाजी गर्न नछोडेपछि सभामुखले प्रधानमन्त्रीको तर्फबाट महालेखा परीक्षकको ५८औं वार्षिक प्रतिवेदन पेश गर्न कानूनमन्त्री ज्ञानेन्द्रबहादुर कार्कीलाई समय दिनुभयो । उहाँले प्रतिवेदन पेश गरे लगत्तै संसद बैठक यही असोज १९ गतेसम्म लागि स्थगित गरिएको छ ।