असोज ३०, धनुषा ।
धनुषाधाम नगरपालिका ५, नौसयबिघा गाउँमा हिन्दू–मुस्लिमले एकापसमा मिलेर टीका लगाएर दसैँको शुभकमना आदानप्रदान गरेका छन् । हिजो दसैँको टीका लगाउने शुभ साइतमा नौसयबिघाका स्थानीयले “समाजिक सद्भाव संस्कार” नारा दिएर आयोजना गरेकोे टीका कार्यक्रममा हिन्दूले मुस्लिमलाई र मुस्लिमले हिन्दूलाई टीका लगाएर शुभकामना आदानप्रदान गरेका छन् ।
धनुषाधाम नगरपालिकाका नगर प्रमुख बालेश्वर मण्डलले कार्यक्रममा उपस्थित हिन्दू–मुस्लिमलाई टीका र जमरा लगाई दिएर शुभकमना दिनुभएको थियो भने टीका कार्यक्रममा करिब तीनसय जनाको उपस्थित थियो । जसमा करिब ६० जना मुस्लिम समुदायका नागरिकले दसैँको टीका ग्रहण गरेका थिए । नौसयबिघा गाउँमा दुईसय घर मुस्लिम समुदायका नागरिकको बसोबास छ ।