कार्तिक १८, दाङ ।
गजल अभियान दाङको आयोजनामा दाङमा ‘तेस्रो दाङ गजल महफिल २०७८ ’ सम्पन्न भएको छ । पछिल्लो समयमा दाङमा गजल महफिल सञ्चालन गर्दै आएको अभियानले आज बिहीबार दाङको घोराहीहमा महफिल सम्पन्न गरेको हो ।
महफिलमा गजलकार दाङका खिमु के.सी., बर्दियाका अञ्जु स्मारिका, गोरखाका सन्तोष आम्गाई, बर्दियाका हिमाल ओली पृथक्, सल्यानका तारादेव शर्मा प्रदर्शन र रोल्पाका सपना डाँगीले गजल वाचन गरेका थिए ।
बाचित रचनाहरु तथा पछिल्लो चरणमा लेखिदै आएका गजलका प्रवृत्तिगत समीक्षात्मक टिप्पणी वरिष्ठ गजलकार टीकाराम उदासीले गरेका थिए ।
कार्यक्रममा प्रगतिशील लेखक सङ्घ दाङका अध्यक्ष भुवन देवकोटालाई संस्थागत सम्मान गरिएको थियो । त्यस्तै कपिलमणि लामिछानेद्वारा स्थापित ठाकुरप्रसाद लामिछाने गजल लेखन पुरस्कारबाट गजलकार सुशील गौतमलाई पुरस्कृत तथा सम्मान गरिएको थियो । प्रतीक सङ्ग्रामीद्वारा स्थापित पानसरी मनविर गजल संगीत पुरस्कारबाट वरिष्ठ गायक तथा संगीतकार शिशिर योगीलाई पुरस्कृत तथा सम्मानित गरिएको थियो ।
साथै कार्यक्रममा गायक तथा संगीतकार सन्तोष श्रेष्ठले गजल गायन गरेका थिए भने गजल गायनमा भुवन गन्धर्वले तबला बाधन गरेका थिए ।
अभियानका संयोजक प्रवल विष्टको अध्यक्षता तथा वरिष्ठ तबला तथा ढोलक बाधक कुमारसिं महाराजको प्रमुख आतिथ्यतामा कार्यक्रम सम्पन्न भएको थियो । अभियानका उपाध्यक्ष आदिम के.सी.को स्वागत मन्तव्यबाट प्रारम्भ भएको कार्यक्रमको सहजीकरण सचिव प्रकाश के.सी.ले गरेका थिए ।