दाङ, २८ मंसीर । सल्यानमा ट्याक्टर दुर्घटना हुँदा एक जनाको मृत्यु भएको छ । मंगलबार बिहान रा १ त १६९८ नंवरको ट्याक्टर सल्यान र रोल्पाको सिमाना रोल्पाको डल्सिङ्गेबाट रुकुम झुल्नेटा जाँदै गर्दा सल्यान बागचौर नगरपालिका – १२ धुराखर्कमा दुर्घटना भएको जिल्ला प्रहरी कार्यालय सल्यानले जनाएको छ ।
दुर्घटनामा परी चालक रोल्पा गंगादेव गाउँपालिका –४ गैरानेटाका अन्दाजी ४८ वर्षीय गंज बहादुर डाँगीको मृत्यु भएको छ । दुर्घटना घाइते भएका डाँगीको उपचारका लागि लिन क्रममा बाटोमै मृत्यु भएको थियो । ट्याक्टर सडकबाट करिब १० मिटर तल खसेको छ । घटनाको थप अनुसन्धान भइरहेको प्रहरीले बताएको छ ।