काठमाडाैं,७ माघ ।
उपत्यकाका तीनवटै जिल्ला स्वास्थ्य कार्यालयले ‘बुस्टर डोज कार्यक्रम’ स्थगित गरेका छन् । भेरोसेल खोप अभाव देखाउँदै कार्यालयले खाेप बन्द गरेकाे हाे। जसका कारण भेरोसेलको बुस्टर मात्रै नभई यसअघि छुटेका पहिलो/दोस्रो डोज लगाउन इच्छुक सर्वसाधारण खोपबाट वञ्चित भएका छन् ।
टेकुस्थित शुक्रराज ट्रपिकल तथा सरुवा रोग अस्पताल,सिभिल अस्पताल वानेश्वर लगायत खाेप केन्द्रहरूमा बिहीबार खोप लगाउनेको भीड थियाे । स्वास्थ्य कार्यालय काठमाडौंको तथ्यांकअनुसार भेरोसेलको दोस्रो र बुस्टर डोज लगाउन बाँकी सर्वसाधारण १० लाखभन्दा बढी छन् ।
ललितपुर र भक्तपुरमा क्रमशः ३ लाख ४ हजार र २२ हजार छन् । कीर्तिपुरमा मात्रै डेढदेखि दुई लाख जना छन् । तीनै जिल्लाका स्वास्थ्य कार्यालयका अनुसार कोभिसिल्ड र जोन्सन एन्ड जोन्सन खोपको भने अभाव छैन । यी खोप लगाउने कार्यक्रम भने जारी छ । स्वास्थ्य कार्यालय काठमाडौं प्रमुख शम्भु काफ्लेले खोप सकिएपछि भेरोसेलको पहिलो डोज लगाउन बन्द गरिएको बताए ।