जेठ १०, काठमाडौँ ।
अर्थतन्त्रमा दवाव कम गर्न सरकारले विलासी वस्तुमा रोक लगाएपछि त्यसको प्रभाव आयातमा सकारात्मक रुपमा देखा परेको छ । सरकारले गत चैत १३ गतेदेखि खेलौना, मोबाइल, मदिरा लगायतका १० वटा वस्तुहरूको आयातमा पूर्ण प्रतिबन्ध लगाएको छ । यसअघि नेपाल राष्ट्र बैङ्कले पनि विलासीताका वस्तुहरूलाई निरुत्साहित गर्न बैङ्कहरूलाई परिपत्र गरेको थियो ।
त्यसयता बाह्य मुलुकबाट हुने आयातमा कमी आएको भन्सार विभागको तथ्याङ्कले देखाएको छ । विभागका अनुसार चालु आर्थिक वर्षको चैतमा नेपालमा बाह्य मुलुकबाट एक खर्ब ५८ अर्बको वस्तु आयात भएको थियो । तर, वैशाखमा यो दर घटेर १ खर्ब ३७ अर्ब ९९ करोडमा पुगेको छ ।
भन्सार विभागका प्रवक्ता पुण्यविक्रम खड्काले सुरुवाती असर सकारात्मक देखिए पनि आयात रोक्ने निर्णयले पारेको प्रभावबारे यकिन तथ्याङ्क आउन समय लाग्ने बताउनुभयो । आयातमा इन्धनको आकार ठूलो रहेकाले सरकारले त्यसको खपत घटाउनतर्फ सचेत हुनुपर्ने उहाँको भनाइ छ ।
