घोराही खानेपानी उपभोक्ता तथा सरसफाई संस्थाको नयाँ नेतृत्वका लागि यही असार २५ गते शनिवारका दिन निर्वाचन हुँदैछ । निर्वाचनमा गठबन्धन र संयुक्त प्यानल गरेर दुई वटा समूह चुनावी मैदानमा छन् । नेपाली कांग्रेस,नेकपा माओवादी र राष्ट्रिय जनमोर्चा समन्वय समितिको समर्थन गठबन्धनका उम्मेदवार देवीबहादुर डिसी प्यानललाई रहेको छ । सोही प्यानलबाट सचिव पदका उम्मेदवार हुन धर्मेन्द्र श्रेष्ठ । सचिव पदका उम्मेदवार श्रेष्ठसँग घोराही खानेपानीको वर्तमान अवस्था, चुनौति र भावी योजनामा केन्द्रित रहेर पत्रकार देबेन्द्र बस्नेतले गरेको कुराकानीको सार संक्षेप ।
तपाईको उम्मेदवारी किन ?
मूलतः घोराहीका सम्पूर्ण उपभोक्ता ज्युहरुलाई खानेपानीको सहजता कसरी बनाउन सकिन्छ ? भन्ने मेरो मुख्य चिन्तन र चासोको विषय हो । बिगतको मेरो यो संस्थासंगको आवद्धताका क्रममा खानेपानीका केहि समस्याहरुको पहिचान, ति समस्याको समाधानका उपाय खोज्ने अवसर मेरा लागि प्राप्त भयो । खानेपानीको उपलब्धताका बिषयमा हामीहरुले धेरै हद सम्मका समस्याहरुलाई समाधान गरेका छौँ । बिगतमा घोराहीबासीहरुले पानी खान नपाएका समस्याहरु हाम्रासामु थिए । थुप्रै उपभोक्ताहरु पानीको माग गर्दै डेलिगेसन आएका उदाहरणहरु पनि हाम्रा सामु थिए । त्यो बेला ट्याङ्कर पठाएर खानेपानीको व्यवस्थापन पनि हामीले गर्यौँ । तर अहिले त्यो क्रम घटेको छ । भलै एकाध टोलहरुमा ति समस्या नभएका भने हैनन् । फलतः घोराही बासीहरुलाई कसरी सहज रुपमा पानी खुवाउन सकिन्छ ? २४ सै घण्टा पानीको सहज उपलब्धताका लागि कसरी काम गर्न सकिन्छ ? मेरो आगामी योजना र सोँच यही नै हो । फलतः समग्रमा घोराहीका उपभोक्ताहरुलाई सहज रुपमा खानेपानी उपलब्ध गराउनु नै मेरो उम्मेदवारीको प्रमुख उदेश्य हो ।
कसरी उपलब्ध गराउने ? के छ योजना ?
मैले अघि पनि भनेँ घोराहीमा खानेपानीको समस्या निर्मूल भैसकेको अवस्था हैन । भलै उल्लेख्य सुधार भएको हो । हिजोका दिनमा जति समस्याहरु थिए, अहिले पनि केही अंश बाँकी छन् नै । घोराहीको खानेपानीको समस्यालाई दीर्घकालीन रुपमा समाधानका लागि एउटा बृहत आयोजना भनेको बबई लिप्टिङ आयोजना नैै हो । जुन आयोजना हाम्रो अघिल्लो कार्यकालमा पास भएर अब निर्माणको प्रकृयामा जाने अवस्थामा छ । यसको डिपिआर भैसकेको छ । अनि टेस्टिङ बोरिङको काम पनि भयो । यो आयोजना आगामी ४० वर्षका लागि पर्याप्त पानी पुर्याउने बलियो आधार बन्ने छ । अहिलेको घोराहीमा पानीको जुन उपलब्धता छ , यो अहिलेका लागि सहज मानिएको छ । तर पानीको यो मात्राले केही वर्ष पछि घोराहीको पानीको मागलाई थेग्न सक्ने अवस्था रहन्न । किन पनि भने घोराहीमा बढ्दो सहरीकरणसँगै घरधुरीहरु थपिने क्रम बढेको बढ्यै छ । फलतः हिजोको हाम्रो योजना अन्तर्गत अहिले उपलब्ध हुँदै आएको पानीले भोलीको त्यो मागलाई थेग्न सक्ने कुरा त भएन । फलतः बबई लिफ्टिङ आयोजना घोराही क्षेत्रको खानेपानीका लागि बृहत आयोजना बन्ने छ । यस अलावा घोराही क्षेत्रको पानीको स्रोतको खोजी पनि अर्को महत्वपूर्ण पाटो हो । फलतः घोराही क्षेत्रमा खानेपानीको सहज उपलब्धताका लागि गर्न सकिने हरेक प्रयत्नहरु गरेर घोराहीका बासिन्दाहरुले २४ सै घण्टा पानी खान पाउने वातावरण बनाईनुपर्छ र मेरो उम्मेदवारी यसैको उपहज हो ।
विगतको तपाईको संस्थासँगको आवद्धताले खानेपानीको क्षेत्रमा गरिएको कामलाई कसरी मूल्याङ्कन गर्नुहुन्छ ?
हिजोको दिनमा पनि मैले यो संस्थामा रहेर घोराहीकै खानेपानीलाई कसरी सहज बनाउने भन्ने विषयमै काम गरेँ । हिजोको हाम्रो नेतृत्वको संयुक्त प्रयासमै बिद्यमान केही ठूला समस्याहरु समाधान भएका पनि छन् । मलाई के लाग्छ भने हिजो घोराहीका बासिन्दाहरुले जसरी खानेपानीको अभाव झेल्नु परेको थियो, उहाँहरुलाई पानी माग्दै डेलिगेसन आउनु पर्ने बाध्यता थियो । त्यो समस्यालाई अहिले धेरै हदसम्म कम गरेर लगिएको छ । हाम्रो संयुक्त पहलमै भएको यो कामले मलाई संस्थामा रहेर काम गर्दाको सुखद अनुभुत दिलाउँछ । तर यो नै पुरापुर हैन । मैले अघि पनि भनेँ , कि समस्याका केही अंशहरु अहिले पनि बाँकी छन् नै । ति समस्याहरुलाई समाधान गर्दै घोराहीमा २४ सै घण्टा पानीको उपलब्धता गराउन सकिन्छ ? भन्ने अबको हाम्रो मुल एजेण्डा बन्नु पर्छ र सोही एजेण्डा पूरा गर्नका लागि मैले आफूलाई संस्थामा पुनः दोहोर्याउने योजनामा छु ।
जित्ने आधारहरु के के देख्नु हुन्छ ?
म यो संस्थामा यो भन्दा अघि दुई कार्यकाल आवद्ध भैसकेको छु । यो दुई कार्यकाल सदस्य बनेर काम गर्दा मैले घोराहीमा खानेपानीको समस्याका बारेमा मात्रै हैन, ती समस्याहरुको पहिचानको बाटो पनि खोजेँ । अध्यक्ष देबीबहादुर डिसीज्यूसँग सहकार्य गर्ने अवसरले मलाई खानेपानीको क्षेत्रमा काम गर्ने सिकाई प्राप्त पनि भयो । सिकाईसँगै पानीको समस्या समाधानका लागि उपायहरुको खोजी गर्ने कौशलता पनि मिल्यो । यसर्थ मैले दुई कार्यकाल यो संस्थामा रहेर घोराही क्षेत्रको खानेपानीकै बिषयमा काम गर्ने अवसर प्राप्त गरेँ । मैले यहाँ रहेर काम गदै गर्दा मेरो कामको मुल्याङ्कन पक्कै पनि उपभोक्ताज्यूहरुले गर्नुभएकै छ होला । सायदै उपभोक्ता ज्यूहरुको यहि मुल्यांकनकै कारण पनि मलाई उहाँहरुले नै पुनः संस्थामै रहन अझ उपल्लो पदमा पदासिन हुनका लागि आग्रह अनुरोध पनि गर्नुभयो । यो म प्रति, मेरो कामप्रतिको उपभोक्ताहरुको सप्रेम हो भन्ने मलाई लाग्छ । म एउटा व्यक्ति उठेको हुँ । मेरो जीतका लागि सबै उपभोक्ताज्युहरुको अपार प्रेम, सद्भाव र सहयोग नै अपरिहार्य हो । म बिश्वस्त छु , मलाई समग्र उपभोक्ता ज्युहरुको त्यो प्रेम, सद्भाव र सहयोग मिल्ने छ र म घोराही खानेपानीको सचिवमा निर्वाचित हुने छु । खानेपानीको क्षेत्रमा कटिवद्ध रहेर काम गर्ने प्रणसहित सबै आम उपभोक्ता ज्युहरुलाई मेरो अनुरोध छ ‘मलाई तपाईहरुले अमूल्य मतले बिजयी बनाईदिनु होला ।’
