३१ साउन, दाङ ।
दाङमा सबै बालिकाहरुको शिक्षा र स्वास्थ्यमा पहुँच पुर्याउन ‘बिमला योगी बालिका शिक्षा तथा स्वास्थ्य कार्यक्रम’ शुभारम्भ गरिएको छ । नेपाल महिला सामुदायिक सेवा केन्द्रको समन्वयमा सामाजिक अभियन्ता बिमला योगीले कुनै पनि बालिका शिक्षा पाउनबाट वन्चित नहोऊन भन्दै सबैलाई सहज रुपमा शिक्षामा पहुँच पुर्याउन यो कार्यक्रम ल्याउनुभएको छ ।
केन्द्रकी अध्यक्ष कल्पना न्यौपानेको अध्यक्षता तथा शैक्षिक एवम् सामाजिक व्यक्तित्व गोविन्दप्रसाद न्यौपानेको प्रमुख आतिथ्यमा आज एक कार्यक्रम गरी ‘बिमला योगी बालिका शिक्षा तथा स्वास्थ्य कार्यक्रम’ शुभारम्भ गरिएको हो । उहाँका अनुसार, संस्थाको ४० लाख र आफ्नो व्यक्तिगत १० लाख गरी कुल ५० लाख लगानी गरी ‘बिमला योगी बालिका शिक्षा तथा स्वास्थ्य कार्यक्रम’ शुरु गरिएको छ ।
सो अवसरमा प्रमुख अतिथि न्यौपानेले स्थानीय सरकारले गर्नुपर्ने काममा सामाजिक क्षेत्रमा लामो समयदेखि क्रियाशील योगीबाट निस्वार्थ भावले कामको थालनी गरिनुले सरकारलाई ठूलो सहयोग मिल्ने विश्वास व्यक्त गर्नुभयो । यो अभियान समाज र शिक्षा क्षेत्रमा काम गर्नेहरुका लागि प्रेरणाको श्रोत बनेको बताउनुभयो । शिक्षा, स्वास्थ्य क्षेत्रमा काम गर्ने स्थानीय तहको जिम्मेवारी आफैले लिएर पालिकाको दायित्व पूरा गरेको बताउनुभयो ।
कार्यक्रममा बोल्ने अन्य वक्ताहरुले पनि सामाजिक जागरणका लागि थालिएको यो अभियान निकै अनुकरणीय रहेको बताउनुभएको छ । बालिकालाई शिक्षित बनाउँदै उनीहरुको स्वास्थ्यमा बेलैमा ध्यान दिँदै स्वस्थ बनाउन यो अभियान समाजका लागि निकै उपयोगी रहेको उनीहरुको भनाई थियो ।
‘बिमला योगी बालिका शिक्षा तथा स्वास्थ्य कार्यक्रम’ की अभियन्ता योगीले सबै तहका बालिकाहरु शिक्षाबाट र स्वास्थ्यबाट वन्चित नहोऊन् र उनीहरु स्वस्थ र शिक्षित भएमात्रै समाज र राष्ट्र स्वस्थ हुन्छ भन्ने मान्यताका साथ यो अभियान शुरु गरेको बताउनुभयो । यो अभियान अन्तर्गत बालिकाको शिक्षा, उनीहरुको स्वास्थ्य समस्यालाई सम्बोधन गर्न निशुल्क सेनिटरी प्याड, अन्य उपचार र स्वास्थ्य सचेतनामा लगानी हुनुका साथै सामाजिक जागरणका क्षेत्रमा पनि अभियान संचालन हुने उहाँले बताउनुभयो ।
यसैबीच, संस्थामार्फत पढिरहेका बालबालिकाहरुलाई आज शैक्षिक सामग्री पनि हस्तान्तरण गरिएको छ । संस्थाकी लक्ष्मी गुप्ताका अनुसार, लुम्बिनी प्रदेशका विभिन्न जिल्लामा गरेर हाल ६ सय बढी बालबालिकाहरुको शिक्षामा संस्थाले लगानी गर्दै आएको छ ।
