असोज १७, दाङ ।
नेकपा माओवादी केन्द्रले पार्टी उपाध्यक्ष कृष्णबहादुर महराले आफ्नो नाम समानुपातिकको बन्द सूचीबाट हटाउन लगाएका छन् । योसँगै आज माओवादी केन्द्रले निर्वाचन आयोगमा बुझाएको समानुपातिकको बन्दसूचीबाट महराको नाम हटाइएको हो ।
‘ पार्टी उपाध्यक्ष महराले आफैंले नाम हटाउन लग स्रोताउनुभएको हो ।’ मोओवादी स्रोतले बतायो।
समानुपातिकको बन्दसूचीबाट नाम हटाएर कतै प्रत्यक्ष निर्वाचनमा महरा होमिने त होइनन् भन्ने आशङ्का पनि बढ्न थालेको छ । महराको संघीय संसदका लागि रोल्पा र दाङ गरी तीन निर्वाचन क्षेत्रबाट उम्मेदवारी सिफारिस भएको छ ।
‘महाराजी प्रत्यक्ष निर्वाचनमा उम्मेदवारी हुने भन्नेबारे कुनै त्यस्तो निर्णय भएको छैन । सम्भवतः उहाँ प्रत्यक्ष निर्वाचन पनि लड्नु हुँदैन, हामीलाई आएको जानकारी अनुसार उहाँले आफै नै नाम हटाउन लगाउनुभएको हो । प्रत्यक्ष निर्वाचनमा लड्नका लागि समानुपातिकबाट नाम हटाइएको होइन । नेकपा माओवादी केन्द्रका केन्द्रीय सदस्य तथा दाङ जिल्लाका इन्चार्ज निर्मल आचार्यले बताए ।
यसअघि उनको नाम समानुपातिक बन्दसूचीमा एक नम्बरमा रहेको थियो ।
उनी २०७४ सालमा दाङबाट निर्वाचित भएका थिए। माओवादीभित्र सबभन्दा धेरै संसदीय अनुभव भएका उनले २०४८ सालसहित अहिलेसम्म चार वटा निर्वाचन जितिसकेका छन्।
उनी २०६३/०६४ सालको अन्तरिम संसदमा समेत थिए। उनी २०४८ र २०७० सालमा रोल्पा र २०७४ दाङबाट निर्वाचित भएका थिए।
महराकी छोरी प्रगति महरा भने लुम्बिनी प्रदेश सभाका लागि समानुपातिक सांसद सिफारिस भएकी छन्।
