कार्तिक ४, दाङ ।
दाङको घोराहीमा अवस्थित राजविद्या पाठशालाका विद्यार्थीहरु तिहार मनाउँदै तिहार सम्बन्धी सिकाइ सीप सिकेका छन् ।
विद्यालयले तयार पारेको ‘हाम्रा चाडपर्व’ शीर्षकको स्थानीय पाठ्यक्रम अन्तर्गत तिहार पर्वका बारेमा विद्यार्थीलाई प्रयोगात्मक सीप सिकाइएको विद्यालयले जनाएको छ ।
तिहारको महत्व, तिहार मनाउनुका कारण, तिहार कसरी मनाइन्छ, यमपञ्चकमा ककसको पूजा किन र कसरी गरिन्छ, देउँसी भैलोे खेल्नुका कारण लगायतका विषयमा विद्यार्थीहरुलाई सिकाइ सीप सिकाइएको विद्यालयका प्रिन्सिपल टीकाजंग बिकेले बताए । ‘विद्यालयले तयार पारेको स्थानीय पाठ्यक्रमलाई हामीले सैद्धान्तिक र प्रयोगात्मक रुपमा अध्ययन गराउने गर्दछौँ । हामी तिहारको सँघारमा छौँ, तिहारका पर्वका बारेमा विद्यार्थीहरुलाई ज्ञान दिन पनि आजको कार्यले महत्वपूर्ण भूमिका निर्वाह गरेको जस्तो हामीलाई लागेको छ । यस्ता गतिविधिले विद्यार्थीलाई व्यवहारिक ज्ञान दिनुका साथै व्यवहारिक मैत्री पनि बनाउने हाम्रो अपेक्षा रहेको छ ।’ प्रिन्सिपल बिकेले भने ।
तिहार पर्व विषयक स्थानीय पाठ्यक्रम सिकिरहेका विद्यार्थीहरुले काग तिहार, कुकुर तिहार, लक्ष्मीपूजा, गोवद्धन पूजा, भाइटीका लगायतका विषयमा सिकाइ गरे ।
‘हामीले तिहार मनाउँथ्यौँ, दाजुभाइलाई टीका लगाइदिन्थ्यौँ अनि तिहार सकिन्थ्यो । तर, त्यति मात्र रहेनछ । यमपञ्चकका पाँचै दिन गरिने कार्यको महत्वसमेत बुझ्न सजिलो भयो ।’ कक्षा ७ की छात्रा आहाना भण्डारीले भनिन् ।
`लक्ष्मीपूजा कसरी गर्ने, पूजाकाे विधि तथा लक्ष्मीपूजा गर्नुका कारण समेत आज हामीले थाहा पायाैँ ।´ कक्षा ६ कि छात्रा साकुरा बुढाले भनिन् ।
विद्यार्थीले पूजा प्रविधि मात्र सिकेनन् देउँसी र भैलाे पनि खेले । ` हामी देउँसी र भैलाे मात्र खेलाैनाैँ देउँसी र भैलाेकाे महत्व पनि बुझ्याैँ । ´ कक्षा ७ का छात्र अभि श्रेष्ठले बताए ।
अझै दाङको घोराही उपमहानगरपालिकामा स्थानीय पाठ्यक्रम निर्माण भइसकेको छैन । स्थानीय निकायबाट स्थानीय पाठ्यक्रम लागू नभइसकेको अवस्थामा विद्यालयले आफै स्थानीय पाठ्यक्रम निर्माण गरी प्रयोगमा ल्याएको छ ।
