घोराही, ८ कार्तिक ।
नागरिक समाज दाङले दाङको घोराहीमा रहेको फर्निचर उद्योगमा लागलागी हुँदा भएको क्षतिप्रति दु:ख व्यक्त गरेको छ । आगलागीका कारण करोडौँको भौतिक क्षति हुँदा उद्योग व्यवसायमा ठूलो धक्का लागेको हुँदा पीडित व्यवसायी र परिवारजनमा तत्काल राहत र उचित व्यवस्थापनमा जुट्न सम्बन्धित सबै निकाय, संघसंस्थाहरुमा हार्दिक अनुरोध गरेको छ ।
समाजका संयोजक केबी मसाल र सचिव नारायणप्रसाद श्रेष्ठले एक विज्ञप्ति जारी गर्दै आगलागी घटनाका पीडित व्यवसायीलाई यथाशीघ्र उचित क्षतिपूर्तिको व्यवस्था गर्न अपिल गर्नुभएको छ ।
आकस्मिक रुपमा हुने घटनालाई मध्यनजर गर्दै यस्ता घटना नियन्त्रणका लागि प्रयोगमा आउने जुनसुकै यन्त्र उपकरण तथा साधन श्रोतलाई सदैव चुस्तदुरुस्त राख्न पनि सरोकार सबै निकायलाई गम्भीर ध्यानाकर्षण गराउनुभएको छ ।
जिल्लाको घोराही उपमहानगरपालिका–१५ उमेशमार्गमा रहेका फर्निचर उद्योगमा सोमबार राति आगलागी हुँदा फर्निचर उद्योग जलेर पूर्ण रूपमा खरानी भएको छ भने सवा सात करौडौँ रुपैयाँ बराबरको क्षति भएको छ ।
