राजनीतिमा वितृष्णा होइन आकर्षण बढाउने गरी काम गर्नेछु : खनाल – Kanika Khabar
Friday, March 29Nepali News Portal

राजनीतिमा वितृष्णा होइन आकर्षण बढाउने गरी काम गर्नेछु : खनाल

    मा प्रकाशित

May be an image of 1 person and text that says 'सबै अटने देश, सबैलाई जोड़ने कांग्रेस राजु खनाललाई नै भोट किन? दाड्मा सत्चालित सिमेन्टलगायत अन्य उद्योगहरुबाट सिर्जित वातावरणीय प्रदूषण व्यवस्थापन गर्न विशेष जोड दिन २०७ मंसिर 8 गते रुख चिन्हमा मतदान गरी राजु खनाल दाड क्षेत्र नं. २ (क) प्रदेश सभा उम्मेदवार'२०७० को संविधानसभा निर्वाचनमा दाङबाट निर्वाचित कांग्रेसका राजु खनाल अहिले प्रदेशसभा निर्वाचनमा भिडेका छन् । दाङ क्षेत्र नं. २(१) बाट प्रदेशसभा निर्वाचनमा भिडेका खनालले गठबन्धनको बलियो शक्ति रहेको यो क्षेत्रमा आफ्नो जित सहज दाबी गरेका छन् । मूलतः मतदातामा अघिल्ला जनप्रतनिधिबाट हुन नसकेका कामहरुको विश्लेषण भइरहेको भन्दै खनालले मतदाताको आधारभूत आवश्यकता प्रदान गर्ने सामथ्र्य आफूमा रहेको दाबी गर्छन् । उनै उम्मेदवार राजु खनालसँग सञ्चारकर्मी देवेन्द्र बस्नेतले उनको चुनावी एजेण्डा र चुनाव जित्ने आधार के छन् भन्ने विषयमा केन्द्रित भइ गरेको कुराकानीको सार संक्षेप ।

मतदाताको मनोभाव कस्तो पाउनुभयो ?

मेरो चुनावी क्षेत्र अन्तर्गत बंगलाचुली गााउँपालिकाका केही स्थानमा केही दिन अघिको वर्षाका कारण क्षति पुगेको छ । कतै पहिरोले बाटो बन्द भएको अवस्था, कतै घर भत्किएको/चर्किएको अवस्था छ । यसर्थ त्यहाँ चुनावमा भन्दा पनि आफ्नै व्यवस्थापनको चिन्ता छ । समग्रमा मेरो चुनावी दौडका क्रममा मैले बुझेको र सत्य कुरा के हो भने यो भन्दा अगाडि पनि नेतृत्वमा पु¥यायौँ, काम भएनन् ।

विकासका समस्या छन् । सडकको, खानेपानीको समस्या यथावत छ । विद्यालयको समस्या छ । स्वास्थ्य सेवा प्रभावकारी छैनन् भन्ने खालका गुनासा छन् र यी गुनासाहरू नयाँ होनन्, हिँजो जुन खालका गुनासा थिए अहिले पनि उनै माग राखिरहेको अवस्था छ । मैले पनि यी विषयका सन्दर्भमा प्रष्ट पार्ने, ती काम पूरा गर्ने प्रतिबद्धता पनि गरिरहेको छु । यी काम गर्न सकिन्छ पनि, ममा त्यो सक्षमता छ । मैले मतदाताका यिनै माग सुन्न, गुनासा सुन्न भेटघाटलाई तीव्र बनाएको छु र ती समस्या समाधानका लागि कसरी काम गर्न सकिन्छ भन्ने निक्र्यौल गरिरहेको छु ।

 राजनीतिप्रति मतदाताको दृष्टिकोण कस्तो छ ?

विगतमा पनि हामीले तपाईलाई सधैँ साथ दिँदै आयौँ तर जुन स्थिरताको कल्पना भएको थियो त्यो भएन भन्ने गुनासो छ । यो गुनासो समग्र राजनीतिप्रतिको गुनासो हो । राजनीतिक दलहरू स्थिरताको पक्षमा लाग्नुहोला, हामीलाई सुखसुविधा प्रदान होला भन्ने आशा गरेका थियौँ भनेर मतदाताले गुनासो राख्नुहुन्छ । त्यसमा पनि संविधान निर्माण पछिको अवस्थाबाट मतदाता अझ बढी आशावादी भएको मैले पाएँ तर त्यो आशा पूरा भएन भन्ने नै मतदाताको गुनासो छ ।

देश पुनः राजनीतिक द्वन्द्वमा जस्तै परेको अहिलेको अवस्थाले मतदातामा थप निराशा पैदा भएको छ । यसर्थ राजनीतिक नेतृत्वप्रतिको आक्रोश छ, दलहरूले केही गर्न सकेनन् भन्ने गुनासो स्वाभाविक पनि छ तर यसलाई हामी राजनीतिकर्मीले गम्भीर ढङ्गबाट मनन् गर्नुपर्छ । संविधान निर्माणपछि राजनीतिक स्थिरताको परिकल्पना हामीले पनि गरेका थियौँ र पाँच वर्षसम्मै स्थिर सरकार बन्छ र यसले जनताका आधारभूत आवश्यकतालाई सम्बोधन गर्न भन्ने लागेको थियो तर त्यो हुन सकेन ।

भएका उपलब्धिलाई समेत भत्काउने प्रयास पनि भए । त्यसैले आम नागरिकमा निराशा छ । तैपनि यसको निकासका लागि फेरि राजनीतक दलले नै दिने हो । हामीले भएका उपलब्धिको रक्षा र आधारभूत आवश्यकता सम्बोधनका लागि गठबन्धन गरेर अगाडि बढेका छौँ भनेर मतदातालाई भनिरहेका छौँ, मतदातालाई बुझाउने प्रयत्न गरिरहेका छौँ ।

 मतदाताको गुनासो सम्बोधन गर्ने तपाईका ठोस एजेण्डा ?

अब हिँजोको सोँचले होइन जनताप्रति केन्द्रित हुनैपर्छ । जनताप्रति उत्तरदायी भएर कार्यक्रम, नीति निर्माण गर्न अत्यन्त जरुरी छ । विगतमा पनि तपार्इँहरूले सुन्नुभयो, रेल कुदाउने आश्वासन समेत दिइयो । त्यस्तै पानीजहाजमा घुमाउने आश्वासन दिइयो । खानेपानीको सुविधा दिनसकेका बेला पाइपबाट ग्यास उपलब्ध गराउने सपना बाँडियो ।

यस्ता फगत सपनाहरू पूरा हुने अवस्था नरहेका आश्वासन थिए । यसले आम मतदातामा ठूलो भ्रम पैदा भयो, राजनीतिक दलहरूले झुठो बोल्छन् भन्ने प्रमाणित भयो । यसर्थ अहिले हामीले के भनिरहेका छौँ भने जे गर्न सक्छौँ त्यो मात्रै बोल्छौँ । तत्कालीन रूपमा सबै ठाउँमा सहज यातायात सेवा उपलब्ध हुन सकोस् । सहज रूपमा हाम्रा सन्ततीले गुणस्तरीय शिक्षा आर्जन गर्न सकून् । हरेक नागरिकका लागि गुणस्तरीय स्वास्थ्य सेवामा पहुँच कायम होस् ।

कृषकले समयमै मल तथा बिउ पाउन सकून् र दिन सकिने राहतका कार्यक्रहरू तयार पारेर अघि बढ्ने मेरो योजना हो । प्राकृतिक स्रोत र साधनको संरक्षण र प्रबद्र्धन गरेर रोजगारीको सिर्जना गरिनु अहिलेको आवश्यकता हो । त्यही आवश्यकता परिपूर्ति गर्नतर्फ म लागिपरेको छु, लाग्ने छु र यसको सकारात्मक नतिजाका लागि सफल पनि हुनेछु । म उम्मेदवार भएकोले पनि यही एजेण्डामा केन्द्रित छु ।

 संसद विघटनको ‘राजनीतिक प्रयास’ ले मतदाताको मनोभाव कस्तो बनेको छ ?

यसले धेरै निराशा बढायो नि । चुनावका बेलामा झूठ बोल्छन् र अल्मल्याउँछन् अनि काम पनि उल्टो गर्छन् भन्ने आम बुझाइ छ । बुद्धिजीवीमा पनि राजनीतिक नेतृत्वप्रति आक्रोश छ । त्यसबाट हामीले गल्ती महसुस गरेर अब आउने पुस्ताले मतदाताको त्यो भावनालाई समेटेर गल्ती नगर्ने चेष्टा गर्नुपर्छ । यदि हामीले यसलाई करेक्सन गरेर जान सकेनौँ भने अझ बढी आक्रोश बढ्छ, यथार्थलाई स्वीकार्नु पर्छ ।

यहाँले भनेजस्तो संविधान मास्ने प्रयास जसरी कुनै एक दल विशेष एमालेले गर्न खोज्यो त्यो गलत कदमले एमालेलाई त सबैभन्दा बढी असर त पर्ने नै भयो । त्यससँगै अन्य दललाई पनि त्यो कार्यकलापको असर पुग्ने देखिन्छ । पाँच वर्षसम्मको म्याण्डेट सहित स्थिर सरकारको परिकल्पना हामीले ग¥यौँ । ‘समृद्ध नेपाल, सुखी नेपाली’ को आशा देखाएको सरकारको नेतृत्व गरेको दलबाट ठिक उल्टो भयो । सविधान मास्न खोज्ने हर्कत हुनुलाई आम मतदाताले सही कि गलत भनेर सहजै बुझ्ने कुरा हो ।

स्थिर भनेर परिकल्पना गरिएको सरकारका पालामा भएको अनियमितता, प्रेस माथिको अधिकार कुण्ठित गरिनु आमनागरिकको हित अनुकूलका काम भएनन् । तत्कालीन प्रधानमन्त्रीबाट हरेक शक्तिलाई आफूमाथि केन्द्रित गरेर सर्वसत्तावादी शासक बनेर राज्यसत्ता सञ्चालन गर्न थलियो । कोरोना संक्रमणका बेला नागरिक छटपटाएर बस्नु परेको जर्जर अवस्था थियो । यो बेलामा नागरिकलाई राज्यको सहारा चाहिएको थियो तर त्यही बेला नागरिकका लागि खरिद भएका स्वास्थ्य सामग्रीमा भएका घोटालाले आम नागरिकलाई तत्कालीन राज्य संयन्त्रप्रति झनै बढी क्रुद्ध बनाएको हामीले देख्यौँ ।

मुलुकको मूल कानुनलाई च्यात्ने प्रयत्न कतिसम्म जायज भन्ने प्रश्न आम रूपमा उठ्यो । एउटा प्रधानमन्त्री आफू अल्पमतमा पर्छु कि भन्ने त्रासमा संसदै विघटनसम्मको हर्कत पनि भए । यी समग्र गलत कामका कारण पनि जनतामा निराशा उच्चतम् रूपमा पैदा भयो र मतदाताले प्रत्येक झुठको हिसाब राखेका छन् । हामी अहिले तिनै गलत कदमको विरोधी शक्ति मिलेर गठबन्धनमा छौँ । हाम्रो अहिलेको अजेण्डा पनि के हो त भन्दा मुलुकमा भएका उपलब्धिहरूको रक्षा हाम्रो पहिलो प्राथमिकता हो । त्यसपछि जनताको सेवा सुविधाका लागि हाम्रो अर्को मूल प्रतिबद्धता हो ।

पछिल्लो समयमा राजनीति तर्फ आज जनताको वितृष्णा बढ्दै गएको छ । नेताहरुले चुनावी नाराका रुपमा लिइएका एजेन्डालाई पूरा नगर्नुका कारण पनि वितृष्णा पैदा भएको हो, जुन स्वभाविकै हो । राजीतिमा आम नागरिकको बढ्दै गएको वितृष्णालाई अन्त्य गर्दै राजनीतिलाई आशाको केन्द्र र सम्भावनाको विन्दु महसुस गराउने गरी काम गर्न म प्रतिवद्ध छु । राजनीतिप्रति वितृष्णा नभई आकर्षण बढाउने गरी काम गर्नेछु ।

 तपाईले गठबन्धनको कुरा गर्नुभयो, चुनावमा यसको कार्यान्वयनको पाटोलाई कति मजबुत देख्नुहुन्छ ?

आउँदो निर्वाचनमा अझ कस्सिएर जान्छ । हिँजो स्थानीय तहको चुनावमा गठबन्धन कार्यान्वयनको पहिलो अभ्यास भयो । एउटा पार्टीको चुनाव चिह्नमा अर्को पार्टीका मतदाताले मत हाल्ने अभ्यासको सुरुवात हिँजो भयो । यसको कार्यान्वयनमा केही सामान्य कमजोरी भए होलान् । अर्को कुरा मतदानका क्रममा देखिएको मतपत्रको उल्झनका कारण बदर मतको संख्या बढेर गयो र घोराही उपमहानगरको परिणाम हाम्रो अनुकूल हुन सकेन तर अहिले मतदाता सबै सचेत हुनुहुन्छ ।

मतपत्रको उल्झन पनि अहिले त्यस्तो जटिल छैन र गठबन्धनलाई मजबुत बनाएर राष्ट्रहितका पक्षमा सबै अडिग रहनुपर्छ भन्ने बुझाइ आम मतदातामा परेको छ । यसले पनि गठबन्धन कार्यान्वयनको पाटो बलियो बनेर आगामी निर्वाचनमा गठबन्धनको सहज जित प्रष्टै देखिएको छ । समस्या हामी गठबन्धनभित्र छैन तर यसमा एमालेले फरक दलको चुनाव चिह्नमा किन मत हाल्ने ? भनेर गठबन्धनका मतदातालाई भड्काउन खोजिरहेको अवस्था चाहिँ छ ।

एमालेले मतदातासम्म लैजाने एजेण्डा त कुनै पनि छैन अनि कांग्रेसीको घरमा गएर माओवादीलाई किन भोट हाल्नुहुन्छ ? माओवादीको घरमा गएर कांग्रेसले माओवादीलाई भोटै हाल्दैन, तपाईँहरूले किन हाल्ने ? भनेर यस्ता खालका गठबन्धनका बीचमा भिडाउने खालका भ्रमहरू फैलाउने खालका कामहरू एमालेले गरिरहेको छ । यो भ्रमका कारण गठबन्धनको केही मत आर्जन गर्न सकिन्छ कि भन्ने एमालेको प्रयास हो तर एमालेले सोचेजस्तो समस्या गठबन्धनमा छैन । हिँजोभन्दा अझ कसिलो अवस्थामा अहिले गठबन्धन अगाडि बढेको छ । यदि हामी अहिले चुक्यौँ भने फेरि राजनीतिक अस्थिरतामा मुलुक जान्छ भन्ने चेत गठबन्धनका नेतादेखि तल्लो तहका कार्यकर्तासम्म नै छ ।

 कांग्रेसले आफ्नो योगदानको जस लिन सक्दैन, अरुले लिन्छन् र चुनावी एजेण्डा बनाउँछन् भन्ने चर्चा चल्छ नि, यो सत्य हो ?

यो सत्य हो । मुलुकमा भएका हरेक उपलब्धिको जस एमालेले लिन खोजिरहेको छ । मैले उदाहरणकै रूपमा भन्छु म अहिले जुन निर्वाचन क्षेत्रमा उम्मेदवार बनेको छु यो क्षेत्रमा अघिल्लो पटक एमालेका नेता शंकर पोख्रेल निर्वाचित हुनुभयो र मुख्यमन्त्री पनि बन्नुभयो । उहाँ अहिले प्रतिनिधिसभा सदस्यको उम्मेदवार पनि हुनुहुन्छ । उहाँले हिँजो निर्वाचित भएको क्षेत्रअन्तर्गत बंगलाचुली गाउँपालिकामा के काम गर्नुभयो ? म उहाँलाई सोध्न चाहन्छु ।

म धेरै पटक त्यहाँ पुगेँ तर उहाँले मैले यसो काम गरेँ भनेर देखाउने एउटा ठाउँ छैन । उहाँकै दलका कार्यकर्ताले भने अन्य ठाउँका योजनालाई हामीले गरेका हौँ भनेर प्रस्तुत गरिरहनुभएको छ । मैले फेरि पनि प्रश्न गरेँ कि हिँजो मुख्यमन्त्री भएका शंकर पोख्रेलले गरेका काम खोई ? एउटा त देखाउनुस् । यसर्थ, उहाँहरूले आफूहरूले गलत प्रचारबाजी गरेर हरेक उपलब्धिको जस लिन खोज्नुहुन्छ, यो उहाँहरूको प्रवृत्ति नै हो । तर मतदातालाई यसरी गलत प्रचारबाजी गरेर अब अल्मल्याउन सकिने छैन । मतदाताले सत्य के हो ? भनेर बुझिसक्नुभएको छ ।

 तपाईले चुनाव जित्ने आधार के छन् ?

पहिलो कुरा म संविधानसभा सदस्य हो । म यही निर्वाचन क्षेत्रबाटै निर्वाचित भएर संविधान लेखनजस्तो महत्वपूर्ण ऐतिहासिक काममा सहभागी भएँ । यससँगै मैले यहाँको विकास निर्माणका लागि मेरो अर्को प्रतिबद्धता थियो । मैले संविधान निर्माण र विकास निर्माण दुईवटै प्रतिबद्धता पूरा गरेँ । गत प्रतिनिधिसभा निर्वाचनमा पनि म उम्मेदवार बनेँ ।

त्यो बेला पनि मलाई मतदाताले माया गर्नुभयो तर त्यो बेला माओवादी र एमालेको गठबन्धनका कारण म पराजित बन्न पुगेँ र अहिले पनि मतदाताको भरोसा मप्रति छ । किनभने म हिँजो सांसद भएका बेला पनि कांग्रेस सरकारमै थियो । त्यो बेला म माथि लाञ्छना लगाउने कुनै ठाउँ मैले दिएन । यसले काम गर्न सकेन, आर्थिक हिनामिनामा जोडियो भनेर मैले कतैबाट गुनासो गर्ने ठाउँ दिएनँ । यससँगै हरेक गलत अनियमितताका कुरामा मेरो नाम जोडिएन । यसर्थ यो काम गर्ने मान्छे हो भन्ने बुझाइ मप्रति मतदाताको छ ।

त्यसमा पनि म आन्दोलनबाट आएको व्यक्ति हिँजो पञ्चचायत विरोधी आन्दोलनमा विद्यार्थी आन्दोलनबाट निरन्तर राजनीतिमा सक्रिय रहेको मान्छे हुँ । एउटा सामान्य परिवारबाट राजनीतिमा आएको मान्छे यसलाई सेवाभावले जसरी अगाडि बढाएको छु त्यही आधारबाट नै हो मलाई हेर्ने आम मतदाताको नजर । अहिले मेरो प्रदेश सभा क्षेत्र भनेको गठबन्धनको राम्रो पकड भएको क्षेत्र हो । यसर्थ, सहजतापूर्वक हामीले चुनाव जित्ने आधार छ । र मप्रतिको मतदाताको प्रेम, सद्भावले पनि म जित्छु भन्ने विश्वास छ ।

"कानिका खबर डट कम"

याे नेपाली भाषाकाे डिजीटल पत्रिका हो । हामी तपाईहरुका सामु छुटै महत्वको साथ समाचार पस्कदै छाैं । हामी सधैं तपाईको सल्ला र सुझावकाे लागी अपेक्षा गर्दछाैं । हामीलाई पछ्याउनुभएकोमा धन्यवाद । हरपल तपाइको समाचार साथी कानिका खबर  [Email : [email protected]]

     
प्रतिक्रिया दिनुहोस्