लक्ष्मीपुर अस्पताल : शिलन्यासमै सीमित – Kanika Khabar
Monday, January 30Nepali News Portal

लक्ष्मीपुर अस्पताल : शिलन्यासमै सीमित

    मा प्रकाशित

दाङ, १३ मंसिर ।
दाङ, १२मंसिर । घोराही उपमहानगरपालिका–४ को भकारेमा दुई वर्षभित्र निर्माण सक्ने गरी २०७७ मंसिर १३ गते शिलन्यास भएको १५ शैयाको ‘लक्ष्मीपुर अस्पताल’ निर्माणको काम अझै सुरु हुनसकेको छैन ।

शिलन्यास भएको दुई वर्ष पूरा हुनै लाग्दा समेत अस्पतालको भवन निर्माणको काम सुरु हुन नसकेको घोराही उपमहानगरपालिका स्वास्थ्य शाखा प्रमुख नारायण घर्तीले बताएका छन् । अस्पताल निर्माणका लागि शिलन्यास भए पनि विभिन्न प्राविधिक समस्याका कारण निर्माणमा ढिलाइ भएको प्रमुख घर्ती बताउँछन् । ‘अस्पताल निर्माणका लागि शिलन्यास भए पनि अझै सुरु हुनसकेको छैन’, उनले भने, ‘अब छिट्टै सुरु हुन्छ ।’

भवन निर्माणका लागि शिलन्यास भएको करिब ८ महिनापछि २०७८ असार २८ गते राजेन्द्र निर्माण सेवासँग सम्झौता भए पनि अस्पतालको डिजाइन मन्त्रालयबाट स्वीकृत नहुँदा निर्माणको काम लामो समयसम्म हुन नसकेको घोराही उपमहानगरपालिका पूर्वाधार महाशाखा प्रमुख युवराज पौडेलले बताउँछन् । ‘अस्पतालको भवन निर्माणका लागि निर्माण व्यवसायीसँग सम्झौता भए पनि मन्त्रालयले डिजाइन स्वीकृत नदिँदा काम हुनसकेको थिएन’, पूर्वाधार महाशाखा प्रमुख पौडेलले भने, ‘अहिले रि–डिजाइन स्वीकृत भइसकेकाले अबको केही दिनमै अस्पताल निर्माणको काम सुरु हुन्छ ।’

महाशाखा प्रमुख पौडेलले करिब २०–२५ वटा कोठा भएको एक तले अस्पतालको भवन निर्माणका लागि जग्गा खाली गर्नेदेखि निर्माण व्यवसायीसँग कुरा भइसकेकाले छिट्टै सुरु हुने बताए । ‘भवन निर्माणका लागि डिजाइन स्वीकृत नहुनका साथै अस्पताल निर्माण गर्ने भनेको स्थानमा बसेका एकजना मानिसलाई पनि हटाउनुपर्ने थियो तर हटाउन सकिएको थिएन’, उन भने, ‘अब यी सबै प्राविधिक कामहरू सकिएका छन्, त्यसैले अब छिट्टै निर्माणको काम अघि बढ्नेछ ।’

संघीय सरकारको बजेटमा घोराही उपमहानगरपालिकाले प्राविधिक सहयोग गर्ने गरी अस्पतालको भवन निर्माणका लागि सम्झौता भएको थियो । त्यही सम्झौताअनुसार घोराही उपहानगरपालिकाबाट डिजाइन भएको अस्पतालको भवन मन्त्रालयबाट स्वीकृत नगर्दा लामो समय भवन निर्माणको अलपत्र परेको पूर्वाधार महाशाखा प्रमुख पौडेलले बताएका छन् । ‘अस्पताल शिलन्यासको बेला डिजाइन पनि थिएन, स्टिमेट पनि थिएन, त्यत्तिकै शिलन्यास मात्रै भयो’, प्रमुख पौडेलले भने, ‘जसले गर्दा भवन निर्माणको काममा विभिन्न कारणले ढिलाइ हुने काम भयो ।’

संघीय सरकारको करिब १० करोड ६६ लाख ४ हजार ९ सय १ रूपैयाँमा निर्माण हुने अस्पतालले घोराही उपमहानगरपालिकाका वडा नं. ४, ३, २ र १ नं. का वडाबासीलाई स्वास्थ्य सेवा लिन सहजता हुने घोराही उपमहानगरपालिका स्वास्थ्य शाखा प्रमुख घर्तीले बताए । अस्पतालको तत्कालीन लुम्बिनी प्रदेशका मुख्यमन्त्री एवम् नेकपा एमालेका महासचिव शंकर पोखरेलले शिलन्यास गरेका थिए ।

"कानिका खबर डट कम"

याे नेपाली भाषाकाे डिजीटल पत्रिका हो । हामी तपाईहरुका सामु छुटै महत्वको साथ समाचार पस्कदै छाैं । हामी सधैं तपाईको सल्ला र सुझावकाे लागी अपेक्षा गर्दछाैं । हामीलाई पछ्याउनुभएकोमा धन्यवाद । हरपल तपाइको समाचार साथी कानिका खबर  [Email : [email protected]]

     
प्रतिक्रिया दिनुहोस्