काठमाडौँ, १० माघ ।
उपप्रधानमन्त्री रवि लामिछानेले क्रसर, फरार सांसद र आन्दोलनरत अधिकारकर्मीका विषय एक दुई दिनभित्र सम्बोधन गर्ने बताएका छन् ।
आज प्रतिनिधिसभाको बैठकमा उनले यी तीनवटै विषयमा गृह मन्त्रालय संवेदनशील भएर काम गरिरहेको बताए । नतिजा आउन भने समय लाग्ने उनको भनाइ रहेको छ । ‘क्रसरका विषयमा होस् वा फरार सांसदका विषयमा, वा आन्दोलनरत अधिकारकर्मीका विषयमा, गृह मन्त्रालय अत्यन्त संवेदनशील भएर काम गरिरहेको छ ।’ गृहमन्त्री लामिछानेले भने ।
हत्या अभियोगमा फरार रहेका लक्ष्मी महतो कोइरी प्रतिनिधिसभा सदस्यमा निर्वाचित भएका छन् र उनी संसद बैठकमा सहभागी भइरहेका छन् ।
फरार सांसद संसदमै आउँदा पनि गृहमन्त्रीले पक्राउ गर्न नसकेको भन्दै आलोचना भइरहेको छ ।