दाङ, १३ माघ ।
दाङको टरिगाउँ एयरपोर्टमा सिता एयरले हप्तामा एकपटक उडान भर्ने भएको छ । शुक्रबार टरिगाउँ एयरपोर्टमा परीक्षण उडान भरेको सिता एयरले पहिलो चरणमा हप्तामा एक पटक दाङ काठमाडाैँ उडान भर्ने प्रवन्ध निर्देशक राजेन्द्र बहादुर सिंहले बताए । उडान परीक्षणपछि प्राविधिक समस्या, यात्रु लगायतका विषयमा बोर्डमा छलफल गरेर १० दिनपछि नियमित उडान भर्ने सिंहले बताउनुभयो । यात्रुको मागलाई मध्यनजर गर्दै उडानको तालिका र समय थप्दै जाने उहाँले बताए ।
सो अवसरमा जहाजका पाइलट रविन्द्र डंगोलले धावनमार्गलाई विस्तार गर्नुपर्ने बताउँदै आकाशमा उड्ने चराको नियन्त्रण र एयरपोर्टको उत्तर तर्फ रहेका घरमा राखिएका टंकी, पोल हटाउनुपर्ने बताए । जग्गा प्रशस्त भए पनि धावनमार्ग कम हुँदा ६ हजार ४ सय किलो बोक्न सक्ने क्षमता भएको जहाजले ५ हजार ७ सय किलो मात्रै बोक्न सक्ने बताउँदै पाइलट डंगोलले क्षमता अनुसार यात्रु बोक्नका लागि अझै विस्तार गर्नुपर्ने बताए । परीक्षण उडान भरेको 9 N-AJH कल साइनको सिता एयरको जहाज दिउँसो १ः१८ मिनेट जाँदा एयरपोर्टमा अवतरण भएको थियो ।।
सो अवसरमा सिता एयरका प्रवन्ध निर्देशक, पाइलट लगायतको टिमलाई स्वागत गरिएको थियो । परीक्षण उडानपछि आयोजित कार्यक्रमलाई तुलसीपुर उपमहानगरपालिका प्रमुख टिकाराम खड्का, तुलसीपुर उद्योग बाणिज्य संघका अध्यक्ष रामप्रसाद चालिसे, युवा व्यवसायी बिमल रिजाल लगायतले नियमति उडान गरेमा सहयोग गर्ने बताएका थिए ।
