काठमाडौँ, २९ चैत्र ।
दुई करोडको अडिओ प्रकरणमा मुछिएका राष्ट्रिय स्वतन्त्र पार्टीका नेता तथा सांसद डा. ढाकाकुमार श्रेष्ठलाई पार्टीको साधारण सदस्य समेत नरहनेगरी कारवाही गरिएको छ ।
आज बुधबार बसेको पार्टीको बसेको केन्द्रीय समिति बैठकले अनुशासन समितिले गरेको कारवाहीको सिफारिसलाई अनुमोदन गर्दै श्रेष्ठलाई पार्टीको साधारण सदस्य समेत नरहने गरी कारवाही गरेको हो । डा. श्रेष्ठले मेडिकल व्यवसायी दुर्गा प्रसाईसँगको २ करोड घुस मागेको अडियो सार्वजनिक भएको थियो ।
त्यस्तै, बैठकले श्रेष्ठलाई सांसद पदबाट पनि हटाउने निर्णय गरेको छ । श्रेष्ठलाई कारवाही गरेसँगै रास्वपाले उनको स्थानमा विन्दवासिनी कंसाकारलाई सांसद बनाउने निर्णय गरेको पार्टी सभापति रवि लामिछानेले जानकारी दिए । बैठकपछि अयोजित पत्रकार सम्मेलनमा लामिछानेले श्रेष्ठले उक्त अडियो आफ्नो भएको स्वीकार नगरेपनि पार्टीले छानबिन गर्दा श्रेष्ठकै अडियो प्रमाणीत भएको बताए ।
त्यसअघि बैठकबाट बाहिरिदै ढाकाकुमार श्रेष्ठले केही महिना पहिलेको अडियो अहिले ल्याएर प्रचार गर्नु पार्टीमाथि प्रहार भएको बताएका थिए । श्रेष्ठले आफू पार्टीको सदस्यबाट पनि बाहिरिएको र न्यायिक प्रक्रियामा गइसकेको उल्लेख गरे ।
