काठमाडौं, १७ वैशाख ।
केन्द्रीय अनुसन्धान ब्यूरो (सिआईबी) ले काठमाडौं कपनस्थित सरस्वतीनगरकी निरा पाण्डे आचार्यको हत्यारालाई सार्वजनिक गरेकाे छ । आचार्यकाे हत्या आरोपमा पक्राउ परेका झापाका विनोद विश्वकर्मालाई सिआइबीले सार्वजनिक गरिएको हाे ।
सिआईबी ले आइतबार दिउँसो पत्रकार सम्मेलन गरेर पाण्डेको हत्यामा संलग्न भएको दाबी गर्दै आरोपी झापा मेचीनगर–१० घर भई हाल भक्तपुरका लोकन्थलीमा बस्ने ३५ वर्षीय विनोद विश्वकर्मालाई सार्वजनिक गरेको हो ।
पाण्डेको हत्यामा विश्वकर्मा एक्लैको संलग्न रहेको सिआईबीका एसएसपी दिनेश आचार्यले जानकारी दिए । उनका अनुसार पाण्डेको पसलमा पुगेर विश्वकर्माले केही भाँडा रोजिसकेपछि पैसा लिएर आउँछु भनेर बाहिरिएका र पछि पुनः आएर हत्या गरेका हुन् । आरोपी विश्वकर्माले पसलमै रहेको चक्कुले प्रहार गरेर पाण्डेको हत्या गरेका प्रहरीको भनाइ छ ।
आफूहरूसँगको बयानमा विश्वकर्माले अपराध स्वीकार गरिसकेका एसएसपी आचार्यले जानकारी दिए । पसलमै रहेका बेला ७ वैशाखमा पाण्डेको धारिलो हतियार प्रहार गरी हत्या भएको थियो ।
