दाङ, २६ जेठ ।
भारतले नवनिर्मित संसद भवनमा ‘अखण्ड भारत’ काे नक्सा भन्दै नेपालको लुम्बिनी, कपिलवस्तुदेखि पाकिस्तानको तक्षशिलासम्मको क्षेत्रलाई समेटिएको नक्सा राखेकाे छ ।
भारतको नवनिर्मित संसद् भवनमा राखिएको भित्ते नक्सामा नेपालको समेत केही भूभाग समेटिएको भन्दै नेपालमा यस विषयमा कुरा उठिरहेकाे छ ।
भारतले `अखण्ड भारत’ नक्साको सार्वजनिक गरेपछि नेपालमा `ग्रेटर नेपाल´ काे बहस थालनी भएकाे छ । काङ्ग्रेस महामन्त्री गगनकुमार थापाले `ग्रेटर नेपाल´ काे पक्षमा अभिव्यक्ति दिइरहेका छन् भने काठमाडौं महानगरपालिकाका मेयर बालेन्द्र शाहले आफ्नो कार्यकक्षमा `ग्रेटर नेपाल´ काे नक्सा राखेका छन् ।
उता भारतीय विदेशमन्त्री एस जयशङ्करले ‘अखण्ड भारत’ नक्साको विषय राजनीतिक विषय नभएको बताएका छन् ।
उनले हिजो नयाँ दिल्लीमा सञ्चारकर्मीसँग छिमेकी देशहरुले यो विषयका बारेमा बुझिसकेका भन्दै यसलाई राजनीतिक विषय बनाउन नहुने बताएका हुन् ।
नक्साका सम्बन्धमा यसअघि आफ्नो मन्त्रालयका प्रवक्ताले स्पष्ट पारिसकेको बताउँदै विदेशमन्त्री जयशङ्करले नक्साकै तल साइनबोर्डमा ऐतिहासिक अशोक साम्राज्यको नक्साका बारेमा वर्णन गरिएको समेत उल्लेख उल्लेख गरेका छन् ।
उनलेले छिमेकी देशहरूलाई स्पष्टीकरण चाहियो भने त्यो ठूलो कुरा नभएको पनि धारणा व्यक्त गरे । भारतमा जेठ १४ गते आइतवार उद्घाटन भएको नयाँ संसद् भवनमा ‘अखण्ड भारत’ को नक्सा भित्तामा अङ्कित गरिएको छ ।