बालाराम खड्का
तुलसीपुर, ७ भदौ ।
कहिले यात्रु अभाव त कहिले जहाज अभावको समस्या झेल्दै आएको तुलसीपुरस्थीत टरिगाउँ विमानस्थलमा नियमित उडान हुन सकेको छैन । करिव ४ महिनादेखि बन्द भएको टरिगाउँ विमानस्थलमा फेरि केही दिनदेखि भने सञ्चालनमा आएको छ ।
टरिगाउँ विमानस्थलमा कुनै बेला नेपाल वायुसेवा निगम र निजी विमान कम्पनी सीता एयरले उडान भर्दै आएका थिए । तर पछिल्लो समयमा नेपाल वायुसेवा निगमका विमानहरुको अभाव र अन्य स्थानमा यात्रुहरु बोक्ने गरेका कारण यहाँ विमान आउन सकेका थिएनन् । पछिल्लो केहि साता टरिगाउँ विमान स्थलमा उडान सुरु भएपनि प्रयाप्त यात्रुहरु नहुँदा उडान भने प्रभावित हुने गरेको छ । चार महिनाअघिसम्म नियमित नेपाल वायु सेवा निगमको १९ सिटे ट्वीनअटर हप्तामा ४ दिन तुलसीपुरमा उडान भर्ने गरेको थियो ।
आइतबार, मंगलबार, बिहीबार र शनिबार उडान हुने गरेको थियो । हाल टरिगाउँमा इन्धन डिपो स्थापना भइ सञ्चालनमा पनि आइसकेको छ । तर भाडा भने घट्न सकेको छैन । हाल हप्तामा आइतवार, बुधवार र शुक्रवार उडान हुने गरेपनि मौसम तथा अन्य कारणले गर्दा कहिले काही समस्या हुने गरेको दाङ नागरिक उड्डयन कार्यालय तुलसीपुरका प्रमुख चेतराज भट्टले जानकारी दिएका छन् । यात्रु भए हप्तामा ३ दिन उडान हुने गरेको उनले बताए । ‘म पनि भरखर यहाँ आएको छु, अघिल्नो हप्ता जहाज आएको थियो’,उनले भने,‘यो हप्ता आइतवार पनि उडान भएको छ । यात्रु भए अन्य दिनपनि उडान हुन्छ ।’
भट्टले यात्रुहरुको अभाव र भाडा महंगो भएकाले पनि नियमित उडान हुन नसकेको बताउँछन् । तर नियमित जहाज नआउँदा यात्रुहरुले समस्या भएको बताउँछन् । सिता एयरले भने एकपटक यहाँका यात्रुहरु नेपालगञ्ज लगेर माउण्टेल फलाइट गरेपछि त्यस दिनदेखि उडान भर्न छोडेको छ । तुलसीपुर उद्योग वाणिज्य संघका पूर्व अध्यक्ष विमल रिजालले नियमित उडान नहुँदा यात्रुहरु नपाउने समस्या आएको बताए । ‘सिता एयरले एक पटक यहाँका यात्रुहरुलाई नेपालगञ्ज लगेर छाडेपछि उडान भर्न रोकेको छ’,उनले भने,‘नियमित उडान हुने र भाडादरमा कम गर्न सके यात्रु पाउन खासै समस्या हुँदैन ।’ । उनले यात्रु अभाव भन्ने कुरा गलत भएको भन्दै नियमित उडान भए प्राप्त यात्रुहरु पाइने बताए ।
त्यस्तै तुलसीपुर उद्योग बाणिज्य संघका अध्यक्ष रामप्रसाद चालिसेले नियमित उडान नहुँदा यात्रुहरु बाहिर जिल्ला गएर प्लेन चढ्नुपर्ने भएको बताउँछन् । ‘पहिले नेपाल वायुसेवा निगमका विमानहरु थिएनन् ग्राउण्डेट भएका थिए,तर अहिले एउटा नियमित आउछ । त्यो पनि हप्तामा तीन दिन मात्र हो’, उनले भने । विमान कम्पनीहरुले अन्य स्थानमा बढी भाडा हुने भएकाले यहाँ हुने उडान कटाउने गरेको बताएको छ । कहिले जहाज आउने कहिले नआउने भएपछि धेरै जसो यात्रुहरु नेपालगञ्ज पुगेर जहाज चढ्नुपर्ने बाध्यता छ ।
हाल तुलसीपुरदेखि काठमाडौका लागि ८ हजारदेखिमाथि भाडा रहेको छ । भाडा महंगो र उडान पनि सुनिश्चित नभएका कारणले पनि यात्रुहरु यहाँबाट जहाज चढ्न हिचकिचाउने गरेको उनी बताउँछन । ‘यहाँको फलाइट हुन्छ, हुन भन्ने सुनिश्चित हुन्न अन्य स्थानमा एउटा नएपनि अर्को हुन्छ,त्यही भएर मानिसहरु नेपालगंज वा भैरहवा जाने गर्दछन्’, स्थानीय कमल वलीले भने । ठुलो संघर्षपछि तुलसीपुरमा नेपाल वायुसेवा निगम र निजी विमानले सेवा दिन थालेपनि केहि महिनादेखि भने उडान अनियमित बन्दै गएको छ । तुलसीपुर उपमहानगरपालिका उद्योग वाणिज्य संघको पहलमा विमान स्थल सञ्चालन भएपनि उडानले भने नियमिता पाउन सकेको छैन् ।
यसैबीच तुलसीपुर उपमहानगरपालिकामा रहेको नेपाल वायुसेवा निगमको कार्यालय तुलसीपुर उपमहानगरपालिकाले भाडा तिर्न नसक्ने भन्दै त्यहाँबाट सारिएको छ । तुलसीपुर उपमहानगरपालिकाले यसअघि भाडा तिरेर कार्यालय सञ्चालन गरेपनि हाल भने यहाँबाट अनेत्र सारिएको छ । हाल तुलसीपुर उद्योग वाणिज्य संघको कार्यालयमा कार्यालय सञ्चालन गरेको छ । ‘यहाँ रहेको नेपाल वायुसेवा निगमको सम्पर्क कार्यालय काठमाडौ जाने अवस्था आएपछि तुलसीपुर उद्योग वाणिज्य संघमा कोठा दिएका छौ’, पूर्व अध्यक्ष रिजालले भने,‘यो अत्यन्तै दुःख पक्ष हो ।’
