काठमाडौं , २६ भदाै ।
नेकपा एमालेका उपाध्यक्ष सुवास नेम्वाङको निधन भएपछि मन्त्रिपरिषद्काे आकस्मिक बैठक बस्ने भएको छ ।
नेम्वाङलाई दिइने सम्मानका विषयमा निर्णय लिन मन्त्रीपरिषद् बैठक बस्न लागेको हो ।
नेम्वाङलाई कस्तो सम्मान दिने भन्ने विषयमा प्रधानमन्त्री पुष्पकमल दाहाल प्रचण्ड अहिले परामर्शमा रहेका छन् । प्रधानमन्त्रीले नेम्वाङलाई दिइने सम्मानका लागि परामर्श गरिरहेका छन् । सम्मानको टुङ्गो लागेपछि मन्त्रीपरिषद् बैठक बोलाएर निर्णय लिइने बताइएको छ ।
स्रोतका अनुसार केहीबेरमा मन्त्रीपरिषद् बैठक बसेर नेम्वाङलाई राष्ट्रिय सम्मान दिने निर्णय गर्ने तयारी छ ।
त्यसो भएमा नेम्वाङको शव व्यवस्थापनदेखि अन्त्येष्टिसम्म नेपाली सेना संलग्न हुने स्राेतले बताएकाे छ ।
अन्तिम सम्मानसम्बन्धी कार्यविधिमा तोकिएका बाहेक अरुको हकमा राष्ट्रिय सम्मानबारे मन्त्रीपरिषदले निर्णय गर्नुपर्ने व्यवस्था छ ।
