एजेन्सी ।
इजरायल र हमासबिचको युद्धले दिनानुदिन फरक रुप लिन थालेको छ । आज युद्धको १२ औँ दिन गाजा क्षेत्रको एक अस्पतालमा भएको रकेट आक्रमणमा ५ सय जनाको मृत्यु भएको अनुमान गरिएको छ । गाजाको स्वास्थ्य विभागले इजरायली आक्रमणमा परेर अल– अहली अरब अस्पतालमा रहेका झण्डै ५ सय जनाको मृत्यु भएको दाबी गरेको छ भने इजरायलले यो दाबीको खण्डन गरेको छ ।
इजरायलले दाबीको खण्डन गर्दै अस्पतालमा आफूले आक्रमण नगरेको बताएको छ । इजरायलले आक्रमणको आरोप हमासलाई लगाएको छ । हमासले प्रहार गरेको रकेट असफल हुँदा अस्पतालमा विस्फोट भएको इजरायलले दाबी गरेको बीबीसीले जनाएको छ । हमासले यो घटनालाई युद्ध अपराध भनेको छ ।
यो अस्पतालमा सयौ बिरामी, घाइते र विस्थापितहरु बस्दै आएका थिए । विस्फोटपछि उनीहरुमध्ये सयौ व्यक्ति अस्पतालको भग्नावशेषमा पुरिएका जनाइएको छ । अस्पतालका अनुसार त्यहाँ झण्डै चार हजार जनाले शरण लिएका थिए ।
प्यालेस्टाइनको स्वास्थ्य मन्त्रालयले यो आक्रमण इजरायलले गरेको पुष्टि भए सन् २००८ पछिकै सबै भन्दा घातक आक्रमण हुने जनाएको छ । विश्व स्वास्थ्य संगठनले अस्पतालमा भएको आक्रमणको भत्सर्ना गरेको छ ।
