पाल्पा, ६ कार्तिक ।
हिजो आइतबार पाल्पाको जीप दुर्घटनामा परी मृत्यु हुने ६ जना एकै परिवारका सदस्य रहेका पुष्टि भएको छ । प्रहरीका अनुसार उनीहरू पूर्वी नवलपरासीको देवचुली नगरपालिका रजहरका बासिन्दा हुन् ।
जिल्ला प्रहरी कार्यालय पाल्पाका अनुसार दुर्घटनामा श्रीमान्, श्रीमती, सम्धिनी, बुहारी र दुई नातीको मृत्यु भएको हो। देवचुली नगरपालिका १६ रजहरका ६५ वर्षका कृष्णबहादुर लोहनी र पार्वती लोहनी श्रीमान्, श्रीमती हुन् ।
यस्तै, उनीहरुको बुहारी सबिना र दुई नातीहरू ईसव र सबिसको पनि मृत्यु भएको हो । सबिनाकी आमा लमजुङ बेसीसहर २ भकुण्डेकी ५५ वर्षीया चुना धितालको पनि मृत्यु भएको हो ।
दुर्घटनामा घाइते भएका चालक ईश्वर लोहनी कृष्णबहादुरका छोरा भएको प्रहरीले जनाएको छ । उनको पाल्पा तानसेनस्थित युनाइट मिसन अस्पतालमा उपचार भइरहेको छ । हिजो रानीमहल घुमेर फर्किने क्रममा उनीहरु चढेको बाग्मती प्रदेश ०१–०२६ च ७२०९ नम्बरको जीप दुर्घटना भएको थियो ।
