दाङ, १९ कार्तिक ।
जाजरकोट केन्द्रबिन्दु भएर शुक्रबार राती गएकाे भूकम्पबाट घाइतेमध्ये ३८ जनाको बाँकेकाे भेरी अस्पतालमा उपचार भइरहेकाे छ ।
भेरी अस्पतालमा ३७ जना र नेपालगंज मेडिकल कलेज कोहलपुरमा १ गरी ३८ जना घाईतेको उपचार भइरहेको जिल्ला आपतकालिन कार्यालय संचालन केन्द्र बाँकेका फोकल पर्सन नरेश श्रेष्ठले बताएका छन् ।
गएराती १२ बजेसम्म पाँच जना गम्भीर घाइतेको सफल अपरेसन भएको छ।
त्यस्तै राति नै राति १२:५० बजे थप ६ जना बिरामी एम्बुलेन्सबाट उपचारका लागि भेरी अस्पतालमा ल्याइएको छ।
उनीहरुमध्ये २ जना जाजरकोटका भेरी नगरपालिका र ४ जना रुकुम पश्चिमको सानी भेरी गाउँपालिकाका हुन्।
हाल उपचाररत सबै घाइतेको अवस्था सुधारोन्मुख र खतरामुक्त रहेको फोकल पर्सन श्रेष्ठले बताए। अस्पताल पुर्याउनुपूर्व बाटोमै मृत्यु भएका जाजरकोटको नलगाँड – १ का एक जनाको शव आफन्तलाई बुझाउने प्रक्रिया थालिएको छ।
