गाेबिन्द खड्का
दाङ, १० मङ्सिर ।
अवसरको खोजीमा १४ वर्ष विदेशमा बिताउँदाका कहानी ‘मैले भोगेको युरोप’ पुस्तकका बारेमा लेखक मित्रलाल पार्देले बोल्न थाल्नुभयो । कतै आक्रोश र कतै वेदनाको सन्देश दिने भावभंगी थियो । त्यो कष्ट असह्य भएपछि आमा यामादेवी चश्मा फुकालेरै आँशु पुछ्न थाल्नुभयो ।
उपस्थिति उल्लेख्य थियो । लेखककी आमाले जस्तै आँसु खसाल्न नसके पनि सिंगै हलको ध्यान वक्तातिरै केन्द्रित भयोे । लेखकले गण्यमान्य भद्र भलाद्मी भन्नेहरुबाटै दुःख पाएको गुनासो पोख्नुभयो । ‘उद्योग खोल्छु, उच्च शिक्षा अध्ययन गर्छु भन्दा ऋण पाइँदैन’– पार्देले भन्नुभयो– ‘विदेश जान्छु भन्दा लाखौं निस्किन्छ ।’ उहाँले विदेशमा वियरका बोतल टिप्नेदेखि अनेक काम गरेका सुनाउनुभयो । तर त्यहाँ डाक्टर होस् कि फोहोर टिप्नेको एउटै सम्मान हुन्छ । काम गर्दा ग्लानी हुन्न ।
‘भुइँमान्छेको भोगाइको मार्मिक दस्तावेज हो’– पुस्तकका समीक्षक राप्ती साहित्य परिषदका केन्द्रीय अध्यक्ष डा. टीकाराम उदासीले भन्नुभयो– ‘विदेश जान तम्तयार भएका युवापिढीले एक पटक पढ्नुस् ।’ उहाँका अनुसार आत्मबृत्तान्त होइन आत्मगन्थन छ । युरोपका अ‘ँध्यारा कुरा छन् । नेपालका विकृतिको तुलना छ । कतै पनि नढाँटेर लेखिएको लेखकको खुला किताव हो । विदेशको विकल्प छैन भनेर खुट्टा उचालेकोले पढ्यो भने पनि स्वदेशमै जाति भनेर हच्किन्छ । राप्ती साहित्य परिषद् दाङ शाखा अध्यक्ष दीपक शर्मा (समीर) को अध्यक्षता एवं वरिष्ठ साहित्यकार समालोचक डा. अमर गिरीको प्रमुख आतिथ्यतामा शनिबार घोराहीमा पुस्तक विमोचन गरिएको थियो । परिषद्ले लेखकलाई कदरपत्रले सम्मान गरेको थियो । विशिष्ट अतिथि प्राज्ञ डा. गोविन्द आचार्य, लेखकका पिता प्रेमनारायण र माता यामादेवीलगायतले पुस्तक विमोचन गर्नुभएको थियो ।
यो आत्मबृत्तान्त ६० उपशीर्षकमा छ । एक सय ४६ पृष्ठको पुस्तकमा लेखकले नेपालमा गरिएका सामाजिक काम, विदेशमा भोगेका अनुभूति र पारिवारिक गतिविधि समेट्नुभएको शुभकामना मन्तव्य दिने वक्ताहरुले बताउनुभएको थियो । कार्यक्रममा स्वागत परिषद्का शाखा कोषाध्यक्ष यम रेग्मीले र सञ्चालन सचिव प्रकाश केसीले गर्नुभएको थियो ।
