शिव राज खनाल
दाङ १७ मंसिर
आज ३२ औँ अन्तर्राष्ट्रिय अपाङ्गता दिवस, नेपालमा पनि विभिन्न कार्यक्रम गरी मनाइँदै छ । सोही अनुसार दाङको राजपुर गाउँपालिकामा पनि ‘दिगो विकास लक्ष्य प्राप्तिको प्रतिवद्धताः अपाङ्गता भएका व्यक्तिको अपनत्व र नेतृत्व सहितको ऐक्यवद्धता’ मूल नारासहित अपाङ्गता दिवस मनाइएको हो ।
दिवसको अवसरमा गाउँपालिका उपाध्यक्ष धनपती देवी यादवले अपाङ्गता भएका व्यक्तिको जीवनस्तरमा सुधार ल्याउन अपाङ्गता भएका व्यक्तिको क्षमता अनुसारको कार्यक्रम ल्याउदै स्वरोजगार बनाउने प्रतिवद्धता ब्यक्त गरिन । ‘तपाईंहरुमा पनि समाज परिवर्तन गर्न सक्ने क्षमता छ, तपाईंको जीवनस्तरमा सुधार ल्याउन सीप र क्षमता अनुसार गाउँपालिकाले पहल गर्ने छ ।’ यादवले भनिन् ।
गाउँपालिकाका प्रमुख प्रशासकीय अधिकृत बिष्णु प्रसाद पाण्डेयले अहिले गरेको वर्ग विभाजन अनुसार केही कुरामा दुबिधा देखिएको ठाउँमा गाउँपालिका द्वारा कार्यबिधि परिमार्जन गरी त्यसको समाधानतर्फ लाग्ने प्रतिवद्धता व्यक्त गरे । ‘यहाँ पनि अन्य पालिकामा जस्तै क,ख,ग,घ जस्ता वर्गमा विभाजन गरिएको छ तर कसैको वर्ग तलमाथि भएको गुनासा हामीले सुन्ने गरेका छौ, त्यसलाई पालिकाभित्रै बाट कार्यबिधि परिमार्जन गरी समाधान गर्न सुझाने छौँ ।’ पाण्डेयले भने ।
कार्यक्रममा बोल्दै अपाङ्ग सञ्जाल राजपुर गाउँपालिकाका सहसचिव तारा परियारले अपाङ्गता भएका व्यक्तिहरुलार्इ अझै पनि राज्यले अपहेलना गरेको बताए ।
सोही अबसरमा गाउँपालिका स्तरीय घैटाफोर र कुर्सी दौड प्रतियोगिता खेलको समेत आयोजना गरिएको थियो ।
कार्यक्रमको सहजीकरण महिला तथा बालबालिका शाखाका दुर्गा यादवले गरेका थिए । कार्यक्रम मानवकल्याण तथा वातावरण संरक्षण केन्द्रको समन्वय र गाउँको आयोजनामा सम्पन्न भएको हो ।
हरेक वर्ष डिसेम्बर ३ तारिखका दिन अपाङ्गता भएका व्यक्तिहरुको पूर्ण र समान सहभागिता सुनिश्चित गर्नुका साथै समाजको हरेक क्षेत्रमा र विकासमा उनीहरुको समावेशिताका लागि दिवस मनाउने गरिएको छ ।
