कनिका खबर
साउन ३, काठमाडौं
भारतमा पछिल्लो २४ घण्टामा ३४ हजारभन्दा बढी व्यक्ति कोरोना भाइरसबाट सङ्क्रमित भएका छन् । भारतको स्वास्थ्य तथा परिवार कल्याण मन्त्रालयको पछिल्लो तथ्यांकअनुसार पछिल्लो २४ घण्टामा मात्रै थप ३४ हजार आठ सय ८४ जनामा सङ्क्रमण पुष्टि भएको हो । योसँगै भारतमा कोरोना सङ्क्रमितको संख्या १० लाख ३९ हजारभन्दा बढी पुगेको छ । त्यस्तै पछिल्लो २४ घण्टामा भारतमा थप ६ सय ७१ जनाको मृत्यु भएको छ । भारतमा अहिलेसम्म कोरोनाबाट मृत्यु हुनेको संख्या २६ हजार दुइ सय ७३ पुगेको छ । त्यस्तै सङक्रमण पुष्टि भएकामध्ये ६ लाख ५३ हजारभन्दा बढी निको भएको पनि भारतीय स्वास्थ्य मन्त्रालयले जनाएको छ । पछिल्लो २४ घण्टामा सबैभन्दा बढी महाराष्ट्रमा आठ हजार तीन सय आठ जनामा कोरोना सङक्रमण पुष्टि भएको छ । त्यस्तै तमलिनाडुमा चार हजार पाँच सय ३८, कर्नाटकमा तीन हजार ६ सय ९३, आन्ध्र प्रदेशमा दुइ हजार ६ सय दुइ र दिल्लीमा एक हजार चार सय ६२ जनामा कोरोना देखिएको छ । गत वर्ष डिसेम्बरमा चीनको वुहानबाट सुरु भएको कोरोना भाइरस सङक्रमणबाट विश्वभर एक करोड ४२ लाखभन्दा बढी सङक्रमित भएका छन् ।
