काठमाडौँ, २५ साउन ।
एभरेस्ट प्यारेन्टेरल्स प्रालिले उत्पादन गरेको प्यारासिटामोल इन्फ्युजन र सिप्रोफ्लोक्सासिन ड्रपमा मानव स्वास्थ्यका लागि प्रतिकूल ब्याक्टेरियासहितको फंगल भेटिएको छ । प्रालिले उत्पादन गरेको प्यारासिटामोल इन्फ्युजन र सिप्रोफ्लोक्सासिन ड्रपमा मानव स्वास्थ्यका लागि प्रतिकूल ब्याक्टेरियासहितको फंगल भेटिएको हो ।
वीरगञ्ज पथलैयास्थित औद्योगिक करिडोरमा रहेको यो कम्पनी विश्वव्यापीरुपमा कोभिड महामारीका समयमा मुलुकमा कोभिड–१९ को भाइरस परीक्षणका लागि भिटिएम किट उत्पादन सुरु गरेर चर्चामा आएको थियो । यही कम्पनीको उत्पादन प्यारासिटामोल इन्फ्युजन र सिप्रोफ्लोक्सासिन ड्रपमा ब्याक्टेरियासहितको फंगल भेटिएको हो ।
सन् २०२३ मा उत्पादन भएको र २०२५ अक्टोबरमा म्याद गुज्रिने ब्याच नम्बर सिटिएल ०२१ को प्यारासिटामोल इन्फ्युजन र यही वर्ष २०२४ मा उत्पादन भई जनवरी २०२६ मा म्याद सकिने इसिई२२१ ब्याच नम्बर रहेको सिप्रोफ्लोक्सासिन ड्रपमा ब्याक्टेरिया सहितको फंगल भेटिएको छ ।
नेपाली औषधि बजारमा दुई अर्बभन्दा बढी लगानीमा अत्याधुनिक प्रयोगशाला, उच्च प्रविधिको अनुसन्धानसहित दर्जनौं गुणस्तरीय उत्पादनहरू बजारमा बिक्रीवितरण गर्दै आएको दाबी गर्ने एभरेस्ट प्यारेन्टेरल्सले उत्पादन गरेको औषधिमा ब्याक्टेरिया भेटिएसँगै यस कम्पनीले उत्पादन तथा बिक्री गरिरहेका अन्य औषधिको विषयमासमेत प्रश्न उठेको छ ।
मानव अङ्ग आँखामा प्रयोग हुने सिप्रोफ्लोक्सासिन ड्रप र सामान्य जरो रुघा खोकी टाउको दुखेको समयमा प्रयो गरिने प्यारासिटामोल इन्फ्युजनमा नै यस्तो लापरबाही भेटिएपछि यस कम्पनीले उत्पादन गरेका अन्य औषधिसमेत बजारबाट फिर्ता ल्याएर पुनःपरीक्षण गर्न दबाब बढेको छ ।
नेपालको सबैभन्दा ठूलो इन्जेकसन उत्पादन गर्ने औषधि उत्पादक एभरेस्ट प्यारेन्टेरल्सको उत्पादन गुणस्तरहीन भएको जिकिरसहित विभाग मातहतको शाखाबाटै पत्राचार भएपछि केन्द्रीय औषधि व्यवस्था विभागले प्यारासिटामोल इन्फ्युजन र सिप्रोफ्लोक्सासिन ड्रपमा देखिएको ब्याक्टेरियासहितको फंगलको छानबिनका लागि विभागका आठौं तहका कर्मचारी राजेश श्रेष्ठको संयोजकत्वमा समिति गठन गर्दै समितिको रिपोर्ट नआएसम्मका लागि कम्पनीको थप औषधि दर्ता गर्न रोक लगाएको छ ।
