मा प्रकाशित
दाङ, ३० साउन ।
दाङमा श्रीमानकाे कुटाइबाट श्रीमतीको मृत्यु भएकाे छ । जिल्लाकाे लमही नगरपालिका वडा नम्बर ९ स्याले निवासी चक्र बहादुर ‘श्याम कुमार कुमाल’को कुटपिटबाट उनकी श्रीमती अन्दाजी ४० वर्षीय ईश्वरी कुमालको मृत्यु भएको हो । घटना मङ्गलबार बेलुका करिब ८ बजेको हो ।
कुटपिटबाट मृत्यु भएकी ईश्वरीलाई छोडेर श्याम कुमार घर छोडेर भागेका थिए । उनलाई जलकुन्डीबाट गाउँलेले नियन्त्रणमा लिएर प्रहरीलाई बुझाएका थिए । मृतकका श्रीमान श्याम कुमारलाई नियन्त्रणमा लिएको जिल्ला प्रहरी कार्यालय दाङका प्रहरी प्रवक्ता डिएसपी राम प्रसाद तिमिल्सिनाले जानकारी दिए ।
स्थानीयका अनुसार कुमाल दम्पती दैनिक जसो मादक पदार्थ सेवन गर्ने, झैंझगडा गर्ने गर्दथे । अहिले ईश्वरीको शवलाई पोस्टमार्टमका लागि लमही अस्पतालमा राखिएको छ । उनीहरुका तीन छोरी एक छोरा छन् ।
