दाङ, २५ भदौ ।
अन्तर माध्यमिक विद्यालयस्तरीय कविता प्रतियोगितामा गोरखा इन्टरनेसनल पब्लिक माध्यमिक विद्यालयका कक्षा १० मा अध्ययनरत विद्यार्थी आयुष देवकोटा प्रथम भएका छन् ।
नेपाली कांग्रेस दाङले १११औँ वीपी जयन्तीको अवसरमा भएको अन्तर माध्यमिक विद्यालयस्तरीय कविता प्रतियोगितामा सहभागी ६० बढी विद्यार्थीलाई पछि पार्दै देवकोटा प्रथम भएका हुन् । प्रथम भएका विद्यार्थी देवकोटाले नगद दश हजारसहित मेडल र प्रमाणपत्र प्राप्त गरे । यसैगरी प्रतियोगितामा घोराहीकै पद्मोदय नमुना माध्यमिक विद्यालयमा कक्षा १० मा अध्ययनरत सुप्रिया शर्मा द्वितीय, सिद्धार्थ एकेडेमी घोराहीमा कक्षा ८ मा अध्ययनरत अंशु पौडेल तृतीय भए ।
द्वितीय र तृतीय स्थान प्राप्त गर्ने विद्यार्थीले नगद सात हजार र पाँँच हजारसहित मेडल र प्रमाणपत्र प्राप्त गरहेका छन् । यसैगरी प्रतियोगितामा वीपी कोइराला माध्यमिक विद्यालय बयालेमा अध्ययनरत सुजाता पङ्गाली र सिद्धार्थ एकेडेमी घोराहीमा अध्ययनरत इप्सा न्यौपानेले सान्त्वना स्थान प्राप्त गरहेकी छन् । सान्त्वना स्थान प्राप्त गर्ने विद्यार्थीले नगद १५/१५ सयसहित मेडल र प्रमाणपत्र प्रदान गरिएको थियो ।
उपसभापति कमानसिंह भारतीको स्वागत मन्तव्यबाट सुरु भएको कार्यक्रमको सहजीकरण सचिव बालिका लम्सालले गरेकी थिइन् । प्रतियोगितामा सहभागी विद्यार्थीबाट छनोट गरेर ३६ जना विद्यार्थीलाई कार्यक्रममा कविता वाचनका लागि सहभागी गराइएको थियो ।
