लक्ष्मण बस्नेत
तुलसीपुर,८ मङसिर ।
दाङको तुलसीपुरमा सञ्चालित चौथो हिरा डाँगी स्मृति कप आमन्त्रित फुटबल प्रतियोगिता २०८१ को उपाधि टरिगाउँ युथ क्लब तुलसीपुर १२ ले जितेको छ ।हिरा डाँगी फाउन्डेसन तुलसीपुर ५ को आयोजनामा सञ्चालित प्रतियोगिताको फाइनल खेलमा ब्रीगेड ब्वाइज ललितपुर काठमाडौँलाई २–१ गोलले पराजित गर्दै टरिगाउँ युथ क्लबले उपाधिसँगै बिजेताको ट्रफी उचालेको हो ।
उपाधिसँगै उसले नगद दुई लाख दुई हजार दुई सय, बिजेताको कप, मेडल, प्रमाणपत्र, हात पार्यो । फाइनलमा सम्मानजक हार बेहोरेको ब्रिगेड ब्वाइज उपबिजेतामा सिमित रहदै नगद एक लाख एक हजार एक, कप, मेडल, प्रमाणपत्रमा चित्त बुझाउन बाध्य भयो ।
फाइनल खेलको पहिलो हाफ्मा टरिगाउका जर्सी नम्बर १४ का गणेश हमालले गोल गर्दै टिम लाई १–० अग्रता दिलाउदै गर्दा ब्रिगेड ब्वाइजका जर्सी नम्बर २३ का एन्जल महर्जनले जवाफी गोल गरेर टिम लाई बराबरी गर्न सफल भए ।
त्यस्तै दोस्रो हाफ्मा टरिगाउँका जर्सी नम्बर २ का राज भुसालले गरेको गोल नै टरिगाउँका लागि निर्णायक गोल बन्यो ।खेलमा म्यान अफ द फाइनल टरिगाउँका सन्दिप कार्की भए ।
यसैबिच प्रतियोगिताको समापन समारोह हिरा डाँगी फाउन्डेसनका अध्यक्ष पोखर सिह डाँगीको अध्यक्षता तथा तुलसीपुर उपमहानगरपालिकाका प्रमुख टिकाराम खड्काको प्रमुख आतिथ्य एवम् दङ्गीशरण गाउँ पालिकाका अध्यक्ष शम्भु गिरीको विशिष्ट आतिथ्यमा भएको थियो ।
