कनिका खबर
साउन १६, दाङ
कोरोनाका कारण विदेशमा समस्या परेका ३५ हजार आठ सय चार जना नेपाली स्वदेश फर्किएका छन् । कोरोना संकट व्यवस्थापन केन्द्र सिसिएमसीका अनुसार हवाई मार्ग हुँदै हिजोसम्म विभिन्न २९ मुलुकबाट उनीहरु स्वदेश फर्किएका हुन् । स्वदेश फर्किनेमा सबैभन्दा बढी संयुक्त अरब इमिरेट्स युएईबाट रहेका छन् । युएईमा कोरोनाका कारण समस्या परेका आठ हजार ५० जना नेपाली स्वदेश फर्किएका छन् । त्यस्तै साउदीबाट पाँच हजार ६ सय ११, कुवेतबाट पाँच हजार पाँच सय ४९, मलेसियाबाट पाँच हजार तीन सय ८४, कतारबाट तीन हजार नौ सय ४१ जना नेपाली फर्किएका छन् । बहराइन, कुवेत, अमेरिका, म्यानमार, जापान, दक्षिण कोरिया, श्रीलंका, टर्की, चीनलगायत २९ मुलुकबाट ३५ हजार आठ सय चार जना नेपाली स्वदेश फर्किएका हुन् । यस्तै, विदेशमा मृत्यु भएका दुइ सय २२ शव नेपाल ल्याइएको छ । मलेसिया, साउदी, कतार, कुवेत, दक्षिण कोरिया लगायत मुलुकमा अलपत्र परेका दुइ सय २२ नेपालीको शव स्वदेश ल्याइएको सिसिएमसीले जनाएको छ । वैदेशिक रोजगार बोर्डका अनुसार विदेशमा अझै ९० वटा शव अलपत्र अवस्थामा छन् । नेपाली श्रमिक स्वदेश फिर्तीका लागि तय भएको चार्टर्ड उडानमार्फत् नै ती शव स्वदेश फर्काइने बोर्डले जनाएको छ ।
