कनिका खबर
साउन २०, सप्तरी
जिल्ला सुरक्षा समिति सप्तरीले जिल्लाभरि आजबाद सात दिनको लागि निषेधाज्ञा आदेश जारी गरेको छ । आज बिहान ५ बजेदेखि २६ गते साँझ ५ बजेसम्मको लागि निषेधाज्ञा आदेश जारी गरिएको प्रमुख जिल्ला अधिकारी शङ्करहरी आचार्यले जानकारी दिनुुभयो । हालसम्म ५ सय ३१ जनामा कोरोना सङ्क्रमण देखिएको र राजविराज नगरपालिकामा एक जनाको मृत्युसमेत भइसकेको अवस्थामा सजगता अपनाउन, सङ्क्रमणको विस्तार रोक्न, तथा चेतनामूलक र प्रबन्धनात्मक कार्यहरू आवश्यक रहेको भन्दै कोभिड–१९ को सङ्क्रमणको प्रभावकारी रोकथाम तथा नियनत्रणको लागि अत्यावश्यक कार्यबाहेक कार्य नगर्न निषेधाज्ञा आदेश जारी गरिएको स्थानीय प्रशासनले जनाएको छ ।
स्थानीय प्रशासन ऐन २०२८ को दफा ६ (३) र सङ्क्रामक रोग ऐन २०२० को दफा २ बमोजिम राजविराज नगरसहित जिल्लाभरि निषेधज्ञा जारी गरिएको जिल्ला प्रशासन कार्यालय, सप्तरीको निषेधज्ञा आदेशमा भनिएको छ ।
