कनिका खबर
साउन २६, भक्तपुर
जिल्ला प्रशासन कार्यालय भक्तपुरले राष्ट्रिय परिचय पत्र विवरणको दर्ता प्रक्रिया शुरु गरेको छ । जिल्ला प्रशासन कार्यालयमा सुरु गरेको शुभारम्भ कार्यक्रममा सांसद महेश बस्नेतको विवरण भरेर दर्ताको शुभारम्भ गरिएको हो । जिल्ला प्रशासन कार्यालयमा दुई बुथबाट विवरण दर्ता शुरु भएको छ । एक बुथबाट साउन ४ गतेदेखि शुरु भएको र अर्को बुथ हिजो देखि शुरु भएको प्रमुख जिल्ला अधिकारी हुमकला पाण्डेले जानकारी दिनुभयो । दुई बुथमा दुई कम्प्युटर लगायत आवश्यक उपकरण राखिएको उहाँले बताउनुभयो ।
नागरिकता प्रमाणपत्र लिन आउनेले आवश्यक विवरण भरेर राष्ट्रिय परिचयपत्रका लागि निवेदन दिन सकिने व्यवस्था गरिएको छ । तत्काल भक्तपुर र सूर्यविनायक नगरपालिकामा राष्ट्रिय परिचय पत्रका लागि विवरण संकलन शुरु गरिए पनि अर्को सातादेखि मध्यपुरथिमि र चाँगुनारायण नगरपालिकामा सञ्चालन हुने भएको छ । प्रजिअ पाण्डेका अनुसार कम्प्युटरलगायत प्रविधि जडानका लागि एक साता लाग्ने भएकाले त्यसपछि कोभिड–१९ को जोखिमबाट बच्न स्वास्थ्य मापदण्ड पूरा गरेर विवरण सङ्कलन गरिने छ ।
