कनिका खबर
भदौं १३, भक्तपुर
उपत्यकामा निषेधाज्ञा जारी भएका कारण दूध बिक्री नभएपछि भक्तपुरको सूर्यबिनायकमा दूध सडकमा फ्याँकिएको छ । सूर्यबिनायक नगरपालिका ८ सूर्यविनायक चोकमा रहेको रानीकोट डेरीका सञ्चालकले बिक्री नभएपछि सडकमा दूध फालेका हुन् ।किसानबाट संकलन गरेको दूध बिक्री ठप्प भएपछि शुभमाया श्रेष्ठ सञ्चालक रहेको डेरीले सडकमा दूध फालेको जिल्ला प्रहरी कार्यालय भक्तपुरका प्रमुख तारा थापाले जानकारी दिनुभयो ।
भक्तपुरमा निषेधाज्ञाको समयमा बिहान ९ः१५ बजेसम्म मात्रै दूध तथा खाद्यान्न पसल सञ्चालन गर्न पाइन्छ । त्यस बाहेकका समयमा पानी र औषधिजन्य व्यवसाय मात्रै सञ्चालन गर्न पाईने छ । निषेधाज्ञाका कारण बिक्री घट्दा किसान र व्यवसायी दुवै मारमा परेको नेपाल डेरी एशोसिएसनले जनाएको छ । भक्तपुरमा दैनिक तीन लाख लिटर दूध खपत हुने गरेकोमा निषेधाज्ञाका कारण अहिले एकलाख लिटर हाराहारी मात्रै बिक्री हुने गरेको एशोसिएसनले जनाएको छ ।
