कनिका खबर
भदौं १५, दाङ
भारतका पूर्व राष्ट्रपति प्रणव मुखर्जीको सोमबार ८४ वर्षको उमेरमा निधन भएको छ । कोरोना भाइरसबाट संक्रमितसमेत बनेका मुखर्जीको सोमबार नयाँ दिल्लीस्थित आर्मी आरआर अस्पतालमा निधन भएको हो । सोही अस्पतालमा उनले मस्तिष्कको सर्जरी पनि गरिएको थियो ।
गत मंगलबारदेखि नै मुखर्जीको स्वास्थ्यअवस्था कमजोर बन्दै गएको थियो । मंगलबार रात उनलाई भेन्टिलेटरको सहायतामा राखिएको थियो । उनका छोरा अभिजित मुखर्जीले सामाजिक सञ्जाल ट्विटरमार्फत् उनको निधन भएको पुष्टि गरेका हुन् ।
उनले ट्वीटमार्फत बुवाको मृत्यु भएको जानकारी दिएका हुन् । अगस्ट १० मा मुखर्जी आफैँले ट्वीट गर्दै आफूलाई कोरोना संक्रमण पुष्टि भएको जानकारी गराएका थिए । कोरोना संक्रमण पुष्टि भएको २१ दिनमा उनको निधन भएको हो ।
मुखर्जीको दिमागमा जमेको रगत निकाल्ने क्रममा कोरोन परीक्षण गर्दा उनमा संक्रमण देखिएको बिबिसीले जनाको छ । यसपछि उनी अस्पतालमै थिए ।
मुखर्जी सन् २०१२ देखि सन् २०१७ सम्म भारतको राष्ट्रपति थिए । उनी गत वर्ष भारत रत्नबाट सम्मानित भएका थिए । राष्ट्रपति हुनुअघि आफ्नो ५ दशक लामो राजनीतिक जीवनमा मुखर्जीले वाणिज्य, विदेश, रक्षा र अर्थ मन्त्रालयको जिम्मेवारी सह्मालेका थिए ।
मुखर्जीले अन्तर्राष्ट्रिय मुद्रा कोष र विश्व बैंकका बोर्डमा पनि काम गरेका थिए ।
मुखर्जीको राजनीतिक जीवनको अधिकांश भाग भारतीय कांग्रेसमा बितेको थियो । उनले एकपटक कांग्रेस पार्टी परित्याग गरेर सन् १९८६ मा अलग्गै पार्टी गठन गरेका थिए तर दुई वर्षपछि कांग्रेसमै फर्के ।
मुखर्जी ३७ वर्ष भारतमा सांसद रहे । उनी राजनीतिक दलहरुबीच सहमति निर्माणमा कुशल मानिन्थे । सन् २०१४ अघि कांग्रेसको नेतृत्वमा संयुक्त सरकार चलाउनमा उनको सहमतीय भूमिका महत्वपूर्ण मानिन्छ ।
बिबिसीका अनुसार भारतको प्रधानमन्त्री हुने मुखर्जीको चाहना भने पूरा हुन पाएन । सन् १९८४ मा प्रधानमन्त्री इन्दिरा गान्धीको हत्या भएपछि मुखर्जीले प्रधानमन्त्री हुने प्रयास गरेका थिए ।
यसपछि सन् २००४ मा कांग्रेस पार्टीले अनपेक्षित जित हासिल गरेपछि पनि प्रधानमन्त्री हुने प्रयास गरेका थिए । दुवै पटक उनको प्रयास सफल भएन ।
मुखर्जी सन् २०१२ मा राष्ट्रपति निर्वाचित भए । भारतमा राष्ट्रपति पद आलंकारिकमात्रै भए पनि संसदमा कुनै पनि पार्टीले बहुमत हासिल नगरेको अवस्थामा सरकार निर्माणमा राष्ट्रपति भूमिका महत्वपूर्ण मानिन्छ । मुखर्जीको कार्यकालमा सन् २०१४ मा भएको निर्वाचनमा भारतीय जनता पार्टीले बहुमत हासिल गरेको थियो ।
मुखर्जी २०७३ साल कात्तिक तेस्रो साता नेपालको तीन दिवसीय भ्रमणमा आएका थिए । भारतीय राष्ट्रपतिको भ्रमण १७ वर्षपछि भएको थियो । नेपाल भम्रण गर्ने पछिल्ला भारतीय राष्ट्रपति मुखर्जी नै हुन् ।
