कनिका खबर
भदौं १९, बागलुङ
बुधबार रातिको बाढी र पहिरोले बागलुङको ढोरपाटन नगरपालिका–९ बोबाङमा मृत्यु भएकामध्ये चार जनाको सनाखत भएको छ । सनाखत हुनेमा ढोरपाटन–९ का २६ वर्षका केशमाया विक, ४५ वर्षका विरे विक, २२ वर्षका जीवन विक र ११ वर्षका डल्ले विक रहेको प्रहरीले जनाएको छ । उनीहरुको शव बुर्तिबाङस्थित प्राथमिक स्वास्थ्य केन्द्रमा राखिएको छ । पहिचान भएकाहरुको पोष्टमार्टमको काम आज हुने बताइएको छ । १० जनाको शवको अझै सनाखत हुन बाँकी रहेको प्रहरी नायव उपरीक्षक राजेन्द्र रेग्मीले बताउनुभयो । बुधबार राति आएको बाढी र पहिरोले बस्तीमा क्षति पु¥याउनुका साथै मानिसले भागेर ज्यान जोगाउन खोज्दा खोलाले बगाएको थियो । बगाएकामध्ये केहीको अधिकारीचौर, बुर्तिवाङ र बडिगाड गाउँपालिकासम्म शव भेटिएका छन् । बेपत्ता भएकाहरुको खोजी कार्य आज बिहानैदेखि जारी रहेको छ ।
पहिरोले फलेघर र सुपुर्दुङका दर्जन बढी घर बगाएको छ भने वडा नं. ८ सम्म आइपुग्दा ४० घर बगेका छन् । ढोरपाटन जाने सडकको देउरालीबाट खसेको पहिरोले भुजीखोला थुनिएर ताल बनेको र त्यसपछि बाढी आउँदा ठूलो क्षति पुगेको स्थानीयले बताएका छन् ।