कनिका खबर
भदौं २५, बाजुरा
बाजुराको बुढीनन्दा नगरपालिका वडा नम्बर दुईमा रहेको खाद्य संस्थान कोल्टीमा खाद्यान्न ढुवानी प्रक्रिया सुरु भएको छ । कोल्टी खाद्य संस्थान डिपोमा अहिलेसम्म एकसय १८ क्वीन्टल खाद्यान्न ढुवानी भएको कार्यालयले जनाएको छ । संस्थानमा चामल अभाव भएको लामो समय वितिसक्दा पनि ठेकेदारको लापरबाहीका कारण संस्थानमा खाद्यान्न ढुवानी हुन सकिरहेको थिएन । बाजुराको पूर्वीउत्तरी क्षेत्रमा रहेको एकमात्र खाद्य संस्थान डिपो कार्यालय कोल्टीमा खाद्यान्न अभाव भएको विभिन्न सञ्चार माद्याममा समाचार आएपछि संस्थानमा खाद्यान्न ढुवानी प्रक्रिया सुरु भएको हो । तत्कालका लागि कोल्टी संस्थामा बर्दियाको राजापुर खाद्य व्यवस्थापन तथा व्यापार कम्पनी मुख्य शाखा कार्यालय र खाद्य संस्थान कार्यालय मार्तडीबाट खाद्यन्न ढुवानी भएको खाद्य संस्थान कोल्टीले जनाएको छ । निरन्तर वर्षातका कारण सडक अवरुद्ध हुदा खाद्यान्न ढुवानीमा समस्या भएको बाजुरामा हवाई सेवा तथा खच्चर मार्फत् अहिले धमाधम चामल ढुवानी भइरहेको छ । बुधबारसम्म बर्दियाको राजापुर कार्यालयबाट ३५ क्वीन्टल र खाद्य संस्थान कार्यालय मार्तडीबाट ८३ क्वीन्टल गरी जम्मा १ सय १८ क्वीन्टल खाद्यान्न ढुवानी भएको खाद्य संस्थान कार्यालय कोल्टीले जनाएको छ ।
मा प्रकाशित
